سەرۆکوەزیران، مەسرور بارزانی جارێکی دیکە دیکە پشتیوانیی هەرێمی کوردستان بۆ رێککەوتنی نوێی نێوان هەسەدە و حکوومەتی سووریا دووپاتکردەوە و گوتی "گەلی کورد لە سووریا شایستەی دانپێدانان و رێزلێنانە."

سەرۆکوەزیران لە لێدوانێکیدا بۆ رۆژنامەنووسان لەبارەی رێککەوتنی گشتگیری نێوان حکوومەتی سووریا و هەسەدە گوتی"هیواخوازین ئەمە ببێتە دەستپێکی رێککەوتنێکی بەردەوام لەنێوان هەردوو لادا، کە ئاشتی و سەقامگیری بۆ وڵاتەکە دەهێنێت."

گوتیشی: پێویستە لە رێککەوتنە دووقۆڵییەکەدا رێز لە مافی هەموو پێکهاتەکانی سووریا بگیرێت، بە گەلی کوردیشەوە کە ئازارێکی زۆری چەشتووە و شایستەی ئەوەن دانپێدانرابن و ڕێزیان لێبگیرێت."

سەرۆکوەزیران، مەسرور بارزانی کە بۆ بەشداری لە لووتکەی جیهانیی حکوومەتەکان لە دوبەیە، بە رۆژنامەنووسانی گوت: هەمیشە گوتوومانە هەرێمی کوردستان بەشێکە لە چارەسەر. ئەو چارەسەرە دەکرێت سیاسی بێت، دەکرێت بۆ دابینکردنی ئاسایش و سەقامگیری بێت، دەکرێت بۆ پەرەپێدانی ئابووریش بێت، کە بۆ خەڵکی ئێمە گرنگە. 

گوتیشی: هەروەک دەزانن، هەرێمی کوردستان ماوەیەکی زۆرە دەستی کردووە بە ریفۆرمی ئابووری و ئەمە کاریگەریی هەبووە لەسەر پێشخستنی هەرێمی کوردستان. بۆ ئەوەش ئەگەر بتوانین یارمەتیی زیاتری وڵاتانی دۆست و دراوسێ وەربگرین، ئەمە زیاتر دەکەوێتە خزمەتی خەڵکی کوردستانەوە."