Helly Luv û Demîrtaş di nav kesayetiyên herî bi bandor ên cîhanê de ne

K24- Navenda Nûçeyan

Di nav lîsteya îsal ya Foreign Policy ya kesayetiyên herî bi bandor li cîhanê de, navê du kesayetiyên Kurd heye.

Govara Foreign Policy ya Amerîkî, navê her yek ji Hevserokê Partiya Demokratîka a Gelan (HDP) Selahedîn Demîrtaş û hunermenda Kurd Helly Luv di nav lîsteya 100 kesên herî bi bandor li seranserê cîhanê danaye.

Govara navborî Demîrtaş wek hevrik ji Serokomarê Tirkiyê, Recep Tayyip Erdogan re binav kiriye û nivîsiye: “Demîrtaş kariye ne tenê Kurdan, lê neteweyên din jî li derdora HDP kom bike.”

Li gor heman govarê, ji ber karîzmeya Demîrtaş, di nav medyaya cîhanê de wek “Obama yê Kurd” tê naskirin.

Kesayetiya duyem jî di nav wê lîsteyê de, hunermenda Kurd, Helly Luv e. Foreign Policy nivîsiye ku, ji ber stranên Helly Luv yên ku behsa qehremaniya Pêşmerge û şerê wan yê li dijî DAIŞê kiriye, navûdengiyeke zêde bidest xistiye, strana wê ya binavê Şoreş jî 3 milyon car li ser Youtube hatiye dîtin.

Herwiha govara Amerîkî spasiya qehremanî û hêz û biwêriya Pêşmerge kiriye.

Hellu Luv xelka Dihokê ye, lê di sala 1988an de li Îranê jidayik bûye, piştire ber bi Fenlendayê ve koçber bûye, malbata wê êdî berê xwe daya Amerîka.

Govara Foreign Policy, govareke navdar a Amerîkî ye û her sal lîsteya kesê herî bi bandor li cîhanê belav dike.