Hûrgiliyên serdana şandeya rojavayî bo Kobanê

K24- Kobanê

Şandeyeke payebilind a Amerîkî li Kobanê ligel rayedarên kantonê û berpirsên TEV-DEMê civiya.

Li gor agahiyên ku derbarê wê civînê de hatine belavkirin, berpirsên Fransî û Brîtanî jî ligel berpirsên Amerîkî serdana Kobanê kirine.

Ev yekemîn serdana şandeyeke bi vî rengî ye bo Kobanê.

Şandeya biyanî bi serokatiya, nûnerê taybet ê serokê Amerîk, Brett H. McGurk bû, ligel Rêveberiya Xweseriya Demokratîk a Rojavayê Kurdistanê û Endamê Konseya Rêveber a Tevgera Civaka Demokratîk (TEV-DEM) Aldar Xelîl re hevdîtin pêk anî. 

Tu zanyariyên berfereh derbarê naveroka civînê de nehatina aşkere kirin, lê bi giştî pirsên leşkerî, siyasî, operasyonên YPG û çend pirsên din ên leşkerî hatine gotûbêjkirin.

Ev serdan di demekê de tê ku, nûnerên Rêveberiya Xweser, TEV-DEM û Partiya Yekîtiya Demokratîk (PYD) ji bo danûstandinên Cenêv-3 nehatine vexwendin.

Di vê derbarê de jî, Hevserokê PYDê Salih Mislim ji K24 ragihandiye ku, ew li Cenêvê ligel Amerîkiyan civiyan e û wiha pêde çû: “Amerîkiyan ji me re gotin ku, ew ligel hebûna me di Cenêvê de ne, lê niha ne wext e.”