Serok Barzanî serxweşiyê li malbata Mîr Kamîran Xeyrî Beg dike

K24 – Navenda Nûçeyan

Bi boneya koça dawiyê ya Wekîlê Mîrê Êzidiyan ji bo Karûbarên Olî Mîr Kamîran Xeyrî Beg, Serok Barzanî peyameke sersaxiyê belav kir û û tê de serxweşî li malbata wî, Mîrê Êzidiyan û Kurdên Êzidî kir.

Serok Barzanî di peyama xwe de nivîsî: Bi xem û kovaneke gelekî mezin me nûçeya koça dawiyê ya Wekîlê Mîrê Êzidiyan ji bo Karûbarên Olî Mîr Kamîran Xeyrî Beg bihîst. Xwedêjêrazî Mîr Kamîran kesayetiyekî Kurdperwer û welatparêz û xwedî soz û berkeftiyê malbata mîran û Kurdên Êzidî bû û jidestdana wî, karesateke mezin e.

Herwiha Serokê dibêje: Bi vê hilkefta xemgîn, sersaxî û serxweşiyê li Mîr Hazim Tehsîn Beg, malbata Mîrî, Civata Rûhanî û tevahiya xwişk û birayên Êzidî dikin. Ji xwedêyê mezin dixwazim ku sebr û hedarê bide kesûkarên rihmetî û hemû Kurdên Êzidî û ruha wî şad be û cihê wî bihuşta perîn be.

Wekîlê Mîrê Êzidiyan ji bo Karûbarên Olî Mîr Kamîran Xeyrî Beg duhî ji ber nexweşiyê, li nexweşxaneya Şêxanê koça dawiyê kiribû.

S. B