Hevpeymaniya Navdewletî binkeya serbazî ya Tacî radestî Iraqê kir
Hêzên Hevpeymaniya Navdewletî îro yekşemê Binkeya Serbazî ya Tacî radestî hêzên Iraqî kir.
K24 – Hewlêr
Hêzên Hevpeymaniya Navdewletî îro yekşemê Binkeya Serbazî ya Tacî radestî hêzên Iraqî kir.
Serbazgeha Tacî bi 20 kîlometre dikeve bakurê Bexdayê û çend meh in dibe armaca mûşekan. 47 hezar endamên hêzên ewlehiyê li Serbazgeha Tacî li ser teknîkên dariştina planan ji bo operasyonan, bijîşkiya serbazî û bidestxistina zanyariyên sîxûrî hatin perwerdekirin.
Li gor ragihandina hêzên Hevpeymaniya Navdewletî, vekişîna ji serbazgeha, di çarçoveya planeke demdirêj de û rêkeftina bi Bexdayê re pêk hatiye.
Herwiha hatiye eşkerekirin ku hejmareke kêm ji wan hêzan li Serbazgeha Tacî mane û piştî çend rojan, ew jî dê ji serbazgehê derkevin.
Hevpeymaniya Navdewletî di daxuyaniya xwe de diyar dike: “Çendîn çaksazî li binkeya serbazî ya Iraqê hatine kirin ku bûye cihê sereke yê rahênana hêzên li dijî DAIŞê. Hevpeymaniya Navdewletî bi buhayê 347 milyon dolar alav û pêwîstiyên Serbazgeha Tacî pêşkêşî hikûmeta Iraqê kir.”
Çen roj berê, Donald Trump, Serokê Amerîkayê ragihandibû; hêzên Amerîkayê ji Iraqê vedikişin.
Herwiha îsal Parlementoya Iraqê li ser derketina hêzên Amerîkayê ji Iraqê, deng dabû. Ev jî piştî wê yekê hatibû ku Qasim Suleymanî û Ebû Mehdî Muhendîs ji aliyê firokeyên Amerîkayê ve li Bexdayê hatibûn kuştin.
Î.A
