Swîsreyê derbarê Îranê de berevajî rênimayên Amerîkayê biryar da
Mihemed Cewad Zerîf, Wezîrê Derve Îranê ligel hevtayê xwe yê Swîsreyê Ignazio Cassis geşedanên herî dawî û peywendiyên dualî yên herêmî û navdewletî gotûbêj kirin.
K24 – Navenda Nûçeyan
Mihemed Cewad Zerîf, Wezîrê Derve Îranê ligel hevtayê xwe yê Swîsreyê Ignazio Cassis geşedanên herî dawî û peywendiyên dualî yên herêmî û navdewletî gotûbêj kirin.
Wezareta Derve ya Îranê bi daxuyaniyekê ragihand; Mihemed Cewad Zerîf û Ignazio Cassis li ser mijarên Sûriye, peywendiyên bazirganî yên navbera her du welatan, kanalên darayî yên Swîsreyê û rêkeftina atomî gotûbêj kirin.
Hatiye diyarkirin ku her du wezîran bi hûrgilî behsa "dijayetiya Amerîkayê û hewldanên wê yên ji bo rûxandina peywendiyên siyasî û aborî yên Îranê" kirine.
Li gor daxuyaniyê, Mihemed Cewad Zerîf tekezî li ser hewldanên welatê xwe bo başkirina peywendiyên navbera her du aliyan kiriye û hewldanên xwe yên ji bo vegera bazirganiya derve aniye ziman.
Wezîrê Derve yê Swîsreyê jî pabendbûna welatê xwe bo rêkeftina atomî ya Îranê ragihandiye û gotiye ku ew dê peywendiyên xwe di hemû waran de ligel Îranê berfireh bikin.
Ev di demekê de ye ku piştî vekişîna Amerîkayê ji rêkeftina atomî ya Îran û koma 5+1, ku di sala 2015an de di navbera Tehran û îdareya Barack Obama de hatibû îmzekirin, careke din Washington sizayên xwe bo ser Îranê vegerandine û hişyarî dide welatên cîhanê ku eger bi Îranê re bazirganî bikin, dê sizayên aborî bi ser wan de jî bisepîne.
