Iraq û Îranê rufatên serbazên xwe pevguherandin
Rufatên kuştiyên şerê heşt salan ê navbera her du aliyan têne vegerandin.
Navenda Nûçeyan (K24) – Iraq û Îran îro çarşemê 6ê Cotmeha 2021ê rufatên serbazên xwe yên kuştî li Deriyê Sînorî yê Şelamçe yê li parêzgeha Besrayê pevguherandin.
Îro bi çavdêriya Xaça Sor a Navdewletî, rufatên 11 serbazên Iraqî û 20 serbazên Îranî ku di şerê heşt salan ê navbera her du aliyan de hatibûn kuştin, hatin pevguherandin.
Lijneya Xaça Sor a Navdewletî di daxuyaniyekê de diyar kir; rêxistina wan serperiştiya pevguherandina rufatan kiriye, ku zêdetirî 30 sal in şerê navbera Iraq û Îranê bi dawî bûye.
Di daxuyaniyê de hatiye diyarkirin; hîn jî bi hezaran malbat li benda vegerandina rufatên xizmên xwe ne. Herwiha hat eşkerekirin ku lijneya wan piştevanîkirina wan malbatên ku li benda vegerandina xizmên xwe ne, didomîne.
