Ano Cewher: Hemû ol li Kurdistanê di ewlehiyê de ne

Navenda Nûçeyan (K24) – Wezîra Gihandin û Veguhastinê yê Herêma Kurdistanê Ano Cewher ragihand, ji ber rewşa xirab, Xiristiyan koçber dibin û li Rojhilata Navîn tekane bajarê ku niha ji bo wan ewle ye Enkawa yê ser bi Hewlêrê ve ye ku Xiristiyan lê dimînin.

Cewher ku ji pêkhateya Xiristiyan e ji K24ê re ragihand, biryara Serokomarê Iraqê ya vekişandina biryara Patriyerk Luîs Sako, hîşt ku ew ji Bexdayê derkeve û berê xwe bide Hewlêrê.

Herwiha Cewher tekez kir: “Serokomar nikare bi qedera dêra 200 salî bilîze. Ew dêr berî hemû hikûmetan hebû.”

Derbarê bicihbûna Sako li Hewlêrê de jî got: “Pêwaziya Serok Barzanî, Hikûmeta Herêma Kurdistanê û civaka Kurdistanê ji Luîs Sako re, belgeya wê yekê ye ku Kurdistan hertim landike pêkvejiyanê bûye û herwiha îsbat dike ku hemû ol li Kurdistanê di ewlehiyê de ne.”

Cewher diyar kir: “Di salên 80 yên sedsala borî de, hejmara Xiristiyanan li Bexdayê 2 milyon bû, lê niha kêmtirî 50 hezarî ye. Hejmareke mezin ji wan hatine Herêma Kurdistanê û hejmareke din jî jî koçberî derve bûne.”

Herwiha tekez kir, cudahiya di navbera Iraq û Herêma Kurdistanê de, zîhniyeta hikumraniyê ye û Herêma Kurdistanê bi Iraqê re nayê hevrûkirin.

Wezîra Gihandin û Veguhastinê yê Herêma Kurdistanê amaje bi wê yekê jî kir, Deşta Neynewayê bûye dîl di destê milîsan de.

Tekez kir jî: “Em wê re ne ku divê ew milîs bi rêyên aştiyane bêne derketin. Divê ji wan re were gotin ku ew dever ne yên we ne heta ku hûn ji bo berjewendiyên xwe bikar bînin.”