Aliyên siyasî li ser daxuyaniya Şera: Federalîzm baştirîn çareserî ji bo Sûriyeyê ye
Navenda Nûçeyan (K24) – Daxuyaniyên vê dawiyê yên Ehmed Şera yên derbarê kurdan li Sûriyeyê û çareserkirina pirsgirêkan bi rêya gotûbêjan, bûne cihê dilaramiyê li cem aliyên siyasî li Rojavayê Kurdistanê, lê di heman demê de, nerazîbûn li hember paşeroja Sûriyeyê û qebûlnekirina sîstema federalîzmê nîşan dan.
Aliyên siyasî yên Rojavayê Kurdistanê tekez dikin ku “ne mafê Ehmed Şera ye ku biryareke bi vî rengî bide û divê hemû gelê Sûriyeyê bi diyalogê û di bin ala Komara Sûriyeyê de û bi hesteke bilind ya niştimanperwerî bicivin û van pirsan çareser bikin.
Peyvdarê Encûmena Nişrimanî ya Kurd li Sûriyê (ENKS) Feysel Yûsif ji K24ê re got: “Tiştê ku Şera li ser gelê Kurd gotiye, mijara rêzgirtin û rehetiyê ye ji bo gelê Kurd, ji ber ku Kurd pêkhateyeke bingehîn a gelê Sûriyeye ye. Lê derbarê sîstema federalîzmê de, em di ENKSê de, federalîzmê weke baştirîn çareserî ji bo pêşeroja Sûriyeyê dibînin, wek hemû welatên pêşketî yên cîhanê.
Sekretêrê Partiya Demokrat a Kurd li Sûriyeyê (El-Partî) Nesredîn Ibrahîm jî li ser daxuyaniya Şera ya “federalî li Sûriyeyê nabe” got: “Tiştê ku Şera li ser gelê Kurd gotiye, rêz û hurmetê jê re tê kirin, lê ne mafê wî ye ku ti biryarekê derbarê navendî yan nenavendiya dewletê bide, divê gelê Sûriyeyê bi rêya civîn û diyalogan, beşdarî biryardana li ser paşeroja Sûriyeyê bibin.”
Ehmed Şera di hevpeyvîna bi kenala “Al-Arabia” re gotibû, Kurd beşek in ji pêkhateyên Sûriyeyê, zordarî li wan hatiye kirin û ji erkê wan e ku Kurdan biparêzên û derbarê HSD de jî gotibû, ew bi HSDê re di danûstandinan de ne ji bo çareserkirina kirîza bakurê rojhelatê welat. Herwiha Şera sîstema federalîzmê ji bo Sûriyeyê red kiribû.
