Şandeke Herêma Kurdistanê bo yekalîkirina çarenivîsa zarokên winda serdana Bexdayê dike

Navenda Nûçeyan (K24) - Bi merema yekalîkirina çarenivîsa zarokên winda yên Helebceyê, şandeke Hikûmeta Herêma Kurdistanê bi serokatiya Wezîrê Karûbarên Şehîd û Enfalkiriyan serdana Bexdayê dike.

Wezareta Karûbarên Şehîd û Enfalkiriyan a Hikûmeta Herêma Kurdistanê duhî (Sêşem, 21.01.2025) di ragehandinekê de amaje da, “Şandeke Hikûmeta Herêma Kurdistanê bi serokatiya Wezîrê Karûbarên Şehîd û Enfalkiriyan Ebdila Hacî Mehmûd û Sikirtêrê Borda Girêdayî Yekalîkirina Çarenivîsa Zarokên Winda Dilsoz Celal Hisên serdana Bexdayê dike.”

Li dû wê ragehandinê, biryar e ew şand îro û sibe (22-23.01.2025) bi aliyên peywendîdar ên Hikûmeta Îraqê re bicive, ji bo lidûçûna dosye û çarenivîsa zarokên winda yên Helebceyê.

Dilsoz Celal her duhî taybet ji Malpera K24ê re got, “Sibe (Çarşem, 22.01.2025) Borda Taybet a Zarokên Winda yên Helebceyê bi serokatiya Wezîrê Şehîd û Enfalkiriyan diçe Bexdayê.”

Navbirî eşkere jî kir, “Ew bord ji nûnerên wezaretên Dad, Navxwe, Tendirustî, Kar û Karûbarên Civakî û Fermangeha Peywendiyên Derve ya Hikûmeta Herêma Kurdistanê pêk hatiye.”

Sikirtêrê Borda Girêdayî Yekalîkirina Çarenivîsa Zarokên Winda ron jî kir, “Em di vê serdanê de bi wezaretên peywendîdar ên Hikûmeta Îraqê û Balyozê Îranê li Bexdayê re dicivin, ji bo ku piroseya lidûçûna keysên zarokên winda bileztir bikin, ji ber ku heta niha çarenivîsa hejmareke zêde ya zarokên winda diyar nîne.”