Siyasî

PWK: Roja Zimanê Zikmakî ya Cîhanî Pîroz Be!

berî 10 meh

Kurdistan Zimanê Dayikê Zimanê Kurdî PWK

Navenda Nûçeyan (K24) - Buroya Ragihandinê ya Partîya Welatparêzên Kurdistanê (PWK) peyamek bi helkeftina Roja Cîhanî ya Zimanê Dayikê parve kiriye, ev jî tekista wê ye:

21ê Sibatê Roja Zimanê Zikmakî ya Cîhanî Pîroz Be!

Roja 21ê Sibatê li cîhanê ji alîyê UNESCOyê ve wek ‘’Roja Zimanê Zikmakî ya Cîhanî’’ hatîye qebûlkirin.

Di cîhanê de, zimenekî herî zêde tûşî zilm, zordarî û neheqîyê bûye û îro jî bi awakî dijwar û nemirovî di aşê asîmîlasyonê de tê hêrandin, bê gûman zimanê kurdî (kurmancî û zazakî/kirdkî) ye.

Li Bakurê Kurdistanê û li Tirkîyeyê, her çiqas li gel hemû astengîyan dersa bijarte ya kurdî hebe jî di derbarê perwerdeyê û di weşangerîya televîzyonê de hinek gavên erênî hatibin avêtin jî; mixabin hîna jî wek fermî di Qanûna Bingehîn û yasayên peywendîdar de, li Parlamentoya Tirkîyeyê, zimanê kurdî tune tê hesaibandin. Hîna jî zimanê Kurdî ne zimanekî fermî ye. Hîna jî perwerdeya bi zimanê Kurdî nehatîye qebûl kirin.

Bi siyaseta Dewleta Tirkîyeyê ya bi dehan salan e hatiye meşandin, bi milyonan kurd li Bakurê Kurdistanê û li Tirkîyeyê nikarin û nizanin bi zimanê dayika xwe biaxivin. Ev trajedî û travmayeke mezin û kûr e; yên bûne sebebê vê yekê, faîlê tawana mirovahîyê ne.

Divê li hemberî vê siyaseta asîmlasyon û jenosîda li ser zimanê kurdî, hemû kurdên li Bakurê Kurdistanê û li Tirkîyeyê di derbarê axaftin, fêrbûna kurdî de li ber xwe bidin û bernameyên taybetî pêk bînin.

Divê berî her tiştî, malbatên kurdan di malê de bi zarokên xwe re bi zimanê kurdî bipeyvin û vê yekê weke wezîfeyeke neteweyî bibînin.

Divê malbatên kurdan ji bo zarokên xwe dersa bijarte ya kurdî (kurmancî û zazakî/kirdkî) hilbijêrin.

Divê em axaftin, fêrbûn û axaftina zimanê kurdî wek prensîbeke esasî di jiyanê de pêk bînin.

Divê, hemû partîyên sîyasî, dezgehên sivîl, TV, radyo û rojnameyên kurdan; hemû sîyasetmedar, nivîskar, rewşenbîr û hunermendên kurdan, kurdî bikin zimanê xwe yê esasî yê sîyasetê, nivîsandinê, çalakîyên dezgehên xwe û rewşenbîrî û hunerî.

Divê hemû şaredarî, weqif, dezgehên sivîl û karsaz, dibistan û kursên taybetî yên perwerdeya bi zimanê kurdî dikin vekin.

Roja Zimanê Dayikê bila bibe destpêka bidestxistina mafê perwerdeya bi zimanê kurdî û bila zimanê kurdî bibe zimanê fermî û di hemû pêvajoya perwerdeyê de, bibe zimanê perwedeyê!

Roj 21ê Sibatê û her rojek nû, bila bibe handana her kurdekî bi zimanê dayika xwe biaxive.

21ê Sibatê bila bibe destpêka fêrbûna zimanê Kurdî.

21ê Sibatê Roja Zimanê Dayikê ya Cîhanî Pîroz Be!

Zimanê me hebûna me ye

Kurdistan24 ,