Putin amadebûna xwe ji bo hevdîtina bi Zelensky re nîşan da

Navenda Nûçeyan (K24) – Serokê Rûsyayê Vladîmîr Putîn ragihand, ew amade ye bi Serokê Ukraynayê Volodîmîr Zelenskiy re hevdîtinê bike, lê di heman demê de rewabûna Zelenskiy weke serokkomar jî xist bin nîqaşê û got ku dema serokatiya wî bidawî bûye.

Serokê Rûsyayê Vladîmîr Putîn, di hevdîtineke li gel nûnerên ajansên nûçeyan li Saint Petersburgê de, amadebûna xwe ji bo civîna bi Serokê Ukraynayê Volodîmîr Zelenskiy re nîşan da û got: "Ez amade me bi her kesî re rûnim, Zelenskiy jî di nav de ye."

Lê belê, Putîn pirsî ka di dawiyê de kî dê peymana aştiyê îmze bike û nêrînên xwe yên berê derbarê rewabûna Zelenskiy de dubare kirin. Putîn tekez kir, li gorî destûrê, dema serokatiya Zelenskiy bidawî bûye.

Ukrayna bersivê dide

Li hember vê yekê, serkirdatiya Ukraynayê pêgiriyê li ser wê yekê dike ku li gorî yasaya leşkerî, ji ber êrîşa Rûsyayê hatiye ragihandin ku hilbijartin nikarin bên kirin. Ji ber vê yekê, Ukrayna tekez dike ku Zelenskiy hîn jî bi awayekî rewa di posta xwe de ye û xwedî desthilateke tamam e.

Banga danûstandinan

Di çarçoveya Foruma Aborî ya Navneteweyî ya Saint Petersburgê de, Putîn banga ji nû ve destpêkirina danûstandinên rasterast di navbera Mosko û Kîevê de kir. Destnîşan kir jî, divê ev danûstandinên ku îsal du caran bi navbeynkariya Tirkiyeyê li Stenbolê hatibûn kirin, piştî 22'yê Hezîranê ji nû ve dest pê bikin.

Herwiha Putîn da zanîn, di civînên dawî de hin encamên mirovî yên erênî bi dest ketine, wekî guhertina dîlan û radestkirina termên kuştiyan.