"بێ دادگاییكردنی تۆمه‌تبارانی ئه‌نفال هه‌موو قه‌ره‌بوو و به‌جیهانناساندنێك به‌تاڵ ده‌بێته‌وه"
"داواكارین به زووترین كات فشار بخرێته سه‌ر عێراق بۆ ئه‌وه‌ی په‌یماننامه‌ی رۆما واژۆ بكات"
K24 – هه‌ولێر:
له بیست و هه‌شته‌مین ساڵیادی كاره‌ساتی ئه‌نفال، له به‌رده‌م وه‌زاره‌تی داد و ئه‌نجوومه‌نی باڵای دادوه‌ری له هه‌ولێر گردبوونه‌وه‌یه‌ك به‌ڕێوه‌چوو.
ستار عەبدوللآ نوێنەری کەسوکاری ئەنفالکراوەکان راگه‌یاندراوێكی خوێنده‌وه و رایگه‌یاند: "تۆمه‌تبارانی ئه‌نفال به‌رده‌وام ژماره‌یان له كه‌مبوونه‌وه‌دایه و لێیان ده‌كوژرێت و یان ده‌مرن".
ستار عه‌بدولڵا گوتی: "به‌مه‌ش زیانێكی گه‌وره له دۆسیه‌ی جینۆسایدی كورد ده‌كه‌وێـت".
ئه‌وه‌شی گوت: "چونكه ئه‌و تۆمه‌تبارانه به بارته‌قای قوربانیان له رووی دیاریكردنی حه‌قیقه‌تی تاوانه‌كه بگره زیاتریش مانه‌وه‌یان بۆ دۆسیه‌كه گرینگه".
ئاماژه‌ی بۆئه‌وه‌شكرد: "لاپه‌ڕه‌ی گرینگی تاوانه‌كان له باخه‌ڵی ئه‌ماندایه و لایه‌نێكی لایه‌نێكی گرینگی ده‌رخستنی حه‌قیقه‌ته‌كانن".
نوێنەری کەسوکاری ئەنفالکراوەکان زیاتر گوتی: "به‌بێ دادگاییكردنی ئه‌م تۆمه‌تبارانه هه‌موو قه‌ره‌بوویه‌ك و به‌جیهانناساندنێك به‌تاڵ ده‌بێته‌وه".
شوان سابير نوێنەری رێکخراوەکانیش گوتی: "له‌م یاده‌دا داواكارین به زووترین كات فشار بخرێته سه‌ر عێراق بۆ ئه‌وه‌ی په‌یماننامه‌ی رۆما واژۆ بكات و په‌یوه‌ست بێت به دادگای تاوانی نێوده‌وڵه‌تییه‌وه و ببێته وڵاتی 125 له‌م دادگایه".
م.ح