یەكگرتوو ھەوڵی كۆبوونەوەی لایەنە سیاسییەكان دەدات
"ئێستا تۆپەكە لای ئێمەیە"
K24 – سلێمانی
سەرۆكی فراكسیۆنی یەكگرتووی ئیسلامی لە پەرلەمانی عێراق رایگەیاند، وەك یەكگرتوو ھەوڵدەدەین بۆ كۆبوونەوەی لایەنە سیاسییەكانی باشووری كوردستان، بۆ ئەوەی بڕیار بدەین لە بارەی كێشەكانی عێراق و مەرجەكانی گەڕانەوەمان بۆ بەغدا.
لە لێدوانێكدا بۆ (كوردستان24) موسەنا ئەمین، سەرۆكی فراكسیۆنی یەكگرتووی ئیسلامی لە پەرلەمانی عێراق رایگەیاند: "لەگەڵ ئەمینداری گشتیی باسمان كردووە وەك یەكگرتووی ئیسلامی دەستپێشخەری دەكەین بۆ كۆبوونەوەی لایەنە سیاسییەكان، بۆ ئەوەی گفتوگۆ لەبارەی كێشەكانی عێراق بكەین و بڕیار بدەین چی بكەین، ھەروەھا مەرجمان چی بێت بۆ گەڕانەوەی كورد بۆ بەغدا و دوایین بڕیاری سیاسیی عێراق چییە".
گوتیشی: "سەلیم جبووریی پێی گوتین بۆ ئەوە نەھاتووم بڵێم وەرنەوە بۆ پەرلەمان یان با پەرلەمان كارابكەینەوە، ھاتووم پێتان بڵێم چۆن دێنەوە و چۆن پەرلەمان كارای بكەینەوە ئێوە ئازادن، كورد دەبێ شەریكی سەرەكی بێت لە عێراق و رێز لە ماف و داواكانی بگیرێت".
موسەنا ئەمین، ئاماژەی بۆ ئەوەكرد: "ئێستا تۆپەكە لای ئێمەیە كورد دەرفەتێكی بۆ دروست بووە، جارێكی دیكە قسەی جیدی ھەبێت لە كۆی سیاسەتی عێراقی".
لە 30 نیسانی 2016، خۆپێشاندەران لە بەغدا ھەڵیان كوتایەسەر باڵەخانەی پەرلەمانی عێراق و ئیھانە و سوكایەتی بە ژمارەیەك پەرلەمانتاری كوردیش كرا، ئێستا فراكسیۆنە كوردییەكان گەڕاونەتەوە ھەرێمی كوردستان، ھەندێك لە چاودێرانی سیاسی پێانوایە ھاتنی جبووری بۆ كوردستان ھەوڵێكە بۆ گەڕانەوەی پەرلەمانتارانی كورد بۆ بەغدا.
