ساسان عەونی: هەندێك لە ماستەرپلانی شار و شارۆچكەكان دەگۆڕدرێن
''تێیاندایە ماوەی دە ساڵ زیاتر بەسەر جێبەجێكردنیاندا تێپەڕیوە''
K24- هەولێر:
ساسان عەونی، وەزیری شارەوانی و گەشتوگوزار لەراگەیەندراوێک بڵاویکردەوە: "ئەوان مامەڵە لەگەڵ سێ جۆر ماستەرپلانی شار و شارۆچكەكان دەكەن و هەندێك لە ماستەرپلانەكانیش پێویستیان بە ئەبدێتكردنەوە هەیە''.
دەشڵێت ئێستا سەرقاڵی ئامادەكردنی نەخشەڕێگەیەكن بۆ چاكسازیكردن لەو بابەتەدا كە دواتر پێشكەش بە ئەنجوومەنی وەزیران دەكرێت".
لەبارەی گۆڕینی رەگەزی زەویشەوە دەڵێت: "بە یاسا رێگە بە گۆڕینی رەگەزی زەوی دەدرێت''.
وەزیری شارەوانی و گەشتوگوزار ئاماژەی بەوەشکردووە: ''ئێمە مامەڵە لەگەڵ سێ جۆر ماستەرپلاندا دەكەین، یەكەمیان ئەو ماستەرپلانانەن بۆ شار و شارۆچكەكان جێبەجێكراون، بەشێكی دیكەیان ئەو ماستەرپلانانەن چوونەتە قۆناغی جێبەجێكردنەوەوە، بەڵام تەواو نەكراون''.
هەروەها دەشڵێت: ''بەشێكی دیكەشیان پەیوەندی بە شار و شارۆچكەكانەوە هەیە كە تا ئێستا ماستەرپلانیان نییە و لە هەر سێ جۆریشیاندا گرفتی جۆراوجۆر هەن''.
لەبارەی گۆڕین و ئەدبدێتكردنەوەی ماستەرپلانەكان، ساسان عەونی رایگەیاند: "ئەو ماستەرپلانانەی تەواو كراون و چوونەتە بواری جێبەجێكردنەوەوە، تێیاندایە ماوەی دە ساڵ زیاتر بەسەر جێبەجێكردنیاندا تێپەڕیوە و ئێستاش پێویستییان بە گۆڕانكاری و ئەبدێتكردنەوە و چاكسازی هەیە''.