مه‌سرور بارزانی له‌سه‌ر كوژرانی خێزانه كورده‌كه‌ی توركیا په‌یامێكی بڵاوكرده‌وه
K24 - هه‌ولێر:
مەسرور بارزانی، سه‌رۆكی حكومه‌تی هه‌رێمی كوردستان، نیگەرانی خۆی لە هێرشەکەی سەر خێزانێکی کوردی شاری کۆنیا لە تورکیا راگەیاند و دەڵێت: "چاوەڕێی به سزا گه‌یاندنی ئه‌نجامده‌رانی هێرشەکە دەکەین".
مەسرور بارزانی، سەرۆکی حکومەتی هەرێمی کوردستان لە په‌یامێكدا كه له هه‌ژماری تایبه‌تی خۆی له تۆڕی كۆمه‌ڵایه‌تی تویتەر بڵاویكردووه‌ته‌وه، نووسیویەتی: "زۆر نیگەرانم لەو هێرشەی کراوەتە سەر خێزانێكی کورد لە کۆنیا، سەرەخۆشی قووڵی حکومەتەکەم بە کەسوکاری قوربانیان دەگەیه‌نم، پێشبینی دەکەم ئه‌نجامده‌رانی هێرشەکە بە سزای خۆیان بگەن".
I’m deeply saddened by reports of a vicious attack on a Kurdish family in Konya, Turkey.
— Masrour Barzani پابەندین# (@masrour_barzani) July 31, 2021
I convey the deepest condolences of my govt to the family, and expect the perpetrators to be held fully accountable -mb.
رۆژی هه‌ینی 30ی ته‌ممووز/ یۆلیۆی 2021، خێزانێكی كورد كه له 7 کەس پێكهاتبوون، له شاری كۆنیای توركیا، له‌لایه‌ن توركه نه‌ژادپه‌رسته‌كانه‌وه هێرشیان كرایه سه‌ر و كۆمه‌ڵكوژكران.
عه‌بدولڕه‌حمان كارابولوت، پارێزه‌ری ئه‌و خێزانه كورده تایبه‌ت بۆ كوردستان24 رایگه‌یاند، دوای ئازادكردنی هێرشكاره نه‌ژادپه‌ره‌سته توركه‌كان له زیندان، جارێكی دیكه هێرشكرایه‌وه سه‌ر هه‌مان خێزان و ته‌واوی ئه‌ندامانی ئه‌و خێزانه كورده‌یان كوشتن، كه له حه‌فت كه‌س پێكهاتوون، له‌ناویان سێ ئافره‌ت هه‌بوون.
هه‌روه‌ها گوتی: "دوای كوشتنی ئه‌و 7 كه‌سه، هێرشبه‌ران ئاگریان له خانووی خانه‌واده كورده‌كه به‌ردا و ماڵه‌كه‌شیان سووتاند".
