مه‌سرور بارزانی سوپاسی هاوکاری و پشتگیریی هێزەکانی هاوپەیمانان ده‌كات
هاوپه‌یمانان په‌یامی سه‌ره‌خۆشی شه‌هیدبوونی دوو ئه‌فسه‌ری پێشمه‌رگه له‌لایه‌ن په‌كه‌كه‌وه ده‌گه‌یه‌ننه سه‌رۆكی حكومه‌ت
K24- هه‌ولێر:
ئەمڕۆ پێنجشەممە 16ی ئەیلوولی 2021 مەسرور بارزانی، سەرۆکی حکومەتی هەرێمی کوردستان، پێشوازی لە جەنەراڵ ریچارد بێڵ، جێگری فەرماندەی گشتیی هێزەکانی هاوپەیمانان لە عێراق و سووریا کرد.
لە دیدارەکەدا، دوایین پەرەسەندنەکانی شەڕی تیرۆر پێشهات و گۆڕانکارییەکانی بارودۆخی عێراق و سووریا، تاووتوێ کرا.
جێگری فەرماندەی گشتیی هێزەکانی هاوپەیمانان لە عێراق و سووریا، هاوخەمی خۆی بە سەرۆکی حکومەت گەیاند، بۆ ئەو دوو پێشمەرگەیەی دوێنێ لە دۆڵێ نەقەبای ناحیەی نەهلێی سەر بە قەزای ئاکرێ بەهۆی بۆمبێکی چێندراوی پەکەکە شەهید بوون، پشتیوانیی هاوپەیمانانیشی بۆ هەرێمی کوردستان و هێزی پێشمەرگە دووپاتکردەوە لە ڕووبەڕووبوونەوەی تیرۆر، بەتایبەتی لە ناوچە کوردستانییەکانی دەرەوەی ئیدارەی هەرێم.
سەرۆکی حکومەت، سوپاسی هاوکاری و پشتگیریی هێزەکانی هاوپەیمانانی کرد و جەختی لە گرنگیی کاراکردنی سەنتەرەکانی هەماهەنگی ئەمنیی نێوان پێشمەرگە و سوپای عێراقی کرده‌وه، لە پێناو سەقامگیربوونی دۆخی عێراق و رووبەڕووبوونەوەی ھەڕەشەکانی تیرۆر.
H.B
