كۆرۆنا له‌ عێراق.. ژماره‌ی تووشبوون رووی له‌ هه‌ڵكشان كرده‌وه‌

K24- هه‌ولێر:

وه‌زاره‌تی ته‌ندروستیی عێراق ئاماری 24 كاتژمێری رابردووی تووشبوون، مردن و چاكبوونه‌وه‌ی كۆرۆنای له‌سه‌رانسه‌ری وڵات به‌ پارێزگاكانی هه‌رێمی كوردستانیشه‌وه‌ راگه‌یاند و به‌گوێره‌ی ئاماره‌كه‌، له‌ماوه‌ی 24 كاتژمێری رابردوودا پشكنینی پزیشكی بۆ 18 هه‌زار و 855 كه‌س ئه‌نجامدراوه‌.

وه‌ك له‌ ئاماره‌كه‌دا هاتووه‌، له‌ماوه‌ی شه‌و و رۆژێكدا تووشبوونی هه‌زار و 148 كه‌سی دیكه‌ به‌ په‌تاكه‌ پشتڕاست كرایه‌وه‌، كه‌ دوێنێ تووشبوونی رۆژانه‌ كه‌متر بوو له‌ هه‌زار كه‌س، و زۆرترین ژماره‌ی تووشبوونی ئه‌مڕۆش له شاری دهۆك تۆماركرا، كه‌ بریتییه‌ له 234 حاڵه‌ت.

به‌گوێره‌ی راگه‌یه‌ندراوه‌كه‌ی وه‌زاره‌تی ته‌ندروستی عێراق، له‌ماوه‌ی شه‌و و رۆژێكدا 28 كه‌س به‌هۆی په‌تاكه‌ گیانیان له‌ده‌ستداوه، و شاری سلێمانیش به‌ مردنی 10 كه‌س له‌ پێشه‌وه‌ی پارێزگاكانی دیكه‌یه‌ و هه‌زار و 437 حاڵه‌تی چاكبوونه‌وه‌ش له‌په‌تاكه‌ راگه‌یه‌ندرا.

تا ئێستا كۆی ئه‌وانه‌ی له‌سه‌رانسه‌ری عێراق تووشی په‌تاكه‌ بوونه، ژماره‌یان گه‌یشته‌ 2 ملیۆن و 64 هه‌زار و 11 حاڵه‌ت، له‌و ژماره‌یه‌ش 23 هه‌زار و 372 كه‌س به‌هۆی ڤایرۆسه‌كه‌وه‌ گیانیان له‌ده‌ستداوه، 2 ملیۆن و 16 هه‌زار و 299 كه‌سیش به‌ رێژه‌ی 97.7% به‌ته‌واوی چاك بوونه‌ته‌وه و 24 هه‌زار و 340 كه‌سیش له نه‌خۆشخانه‌كان له‌ژێر چاودێری پزیشكیدان، له‌و ژماره‌یه‌ش 176 كه‌س به‌هۆی ناجێگیری دۆخی ته‌ندروستییان له‌ژێر چاودێری چڕی پزیشكیدان.

ئاماژه‌ به‌وه‌ش دراوه‌، تا ئێستا 6 ملیۆن و 290 هه‌زار و 649 كه‌س له‌ سه‌رانسه‌ری عێراق ڤاكسینی كۆرۆنایان وه‌رگرتووه.

H.B