سهركردیهكی شیعهی عێراق له كۆنسێرتهكهی محەمەد رەمەزان ناڕازییه
"پێویستە سوود لە ئەزموونی نوێی میسر وەرگرین نەک لە ئاهەنگی سەماکانیان"
K24 - ههولێر:
موقتەدا سەدر، رێبەری رەوتی سەدر لە عێراق، لە لێدوانێکدا رایگهیاند، "هاوردەکردنی ئاهەنگی سەماکردن لە میسرەوە لەگەڵ ئایین و دابونەریتە کۆمەڵایەتییەکانی عێراقدا ناگونجێت".
موقتەدا سەدر لە نوێترین لێدوانیدا سەرنجی خستەسەر سوود وەرگرتن لە ئەزموونی نوێی میسر، کە هەڵمەتی خزمەتگوزاری و ئاوەدانکردنەوە لەخۆدەگرێت، کە لە رێگەی هەندێک لە تێڕوانین و بیروبۆچوونەکانی عەبدولفەتاح سیسی، سەرۆکی میسرەوە، دەستی بە پەرەپێدان کرد".
لەبارەی ئەزموونی میسری نوێوە، موقتەدا سەدر رایگەیاند، میسر بە پلانسازی، چاودێرییەکی توند و رێکوپێک و پلانێکی ئەمنیی بە یارمەتی سوپای میسر، هەوڵی دوورخستنەوەی دیمەنی تیرۆریزم و توندڕەوی دەدات".
رێبەری رەوتی سەدر رەخنەی لەو ئاهەنگانە گرت کە لە عێراقدا بۆ هونەرمەندە میسرییەکان ساز دەکرێن و گوتی: "ئەو جۆرە ئاهەنگانە لەگەڵ ئایین و باوەڕ و نۆرمی کۆمەڵگەکەمان ناگونجێت و دوورە لە مامەڵەکردنی عەقڵانی و خۆشەویستی نیشتمان".
لێدوانەکەی رێبەری سەدر لەدوای ئەوە دێت، کە هونەرمەندی میسری محەمەد رەمەزان هەفتەی رابردوو لە عێراق کۆنسێرتێکی ئەنجامدا و دەنگدانەوەی زۆری بەدوای خۆیدا هێنا.