یادی راپەڕینی گەلی کوردستانە

K24 – هەولێر

لە 5ی ئاداری ساڵی 1991ی گەلی کوردستان راپەڕینی دژی رژێمی بەعس دەستپێکرد و لە ماوەی چەند رۆژێکدا زۆربەی شار و شارۆچکەکانی کوردستان رزگار کران.

راپەڕین، کە لە ئەنجامی زوڵم و ستەمی رژێمی بەعسی عێراق هاتە ئاراوە، گەلی کوردستان بە پشتیوانی مەفرەزەکانی هێزی پێشمەرگە لە 5/3/1991 لە سنووری رانیە و قەڵادزێ راپەڕینیان دەستپێکرد، سوپا و دامەزراوەکانی بەعسیان راماڵی، رۆژانی دواتر خەڵکی لە ناوچەکانی دیکە راپەڕین تا ئازاد کردنی شاری کەرکووک.

سنووری رانیە و قەڵادزێ، کە بووە دەروازەی راپەڕینی گەلی کوردستان، ناونرا "دەڤەری راپەڕین" ئێستا ئەو سنوورە خاوەن ئیدارەی سەربەخۆیە.

لە ئەنجامی راپەڕینی ئاداری 1991، گەلی کورد لە باشووری کوردستان بووە خاوەن قەوارەیەکی سەربەخۆ، دواتر پەرلەمان و حکومەتی هەرێمی کوردستانی لێ بەرهەم هات.

ئێستا لە کاتێکدا یادی راپەڕین دەکەینەوە، بەگوتەی بەرپرسانی باڵای هەرێمی کوردستان هێشتا ئاسەنگ و فشار لەناوخۆی عێراق و ناوچەکە لەبەردەم قەوارەی هەرێمی کوردستان هەن، بەتایبەت لە بواری سیاسیی و ئابووری.