نەوت لە سەرووی 125 دۆلار مامەڵەی پێوە دەکرێت
K24 – هەولێر
بەراورد بە دوێنێ نرخی نەوت دابەزینی بەخۆیەوە بینیوە، بەڵام هێشتا لە سەرووی 125 دۆلار مامەڵەی پێوە دەکرێت.
نرخی بەرمیلێک نەوتی خاوی برێنت بە 125,52 دۆلارە، هەروەها نەوتی رۆژئاوای تێکساس بۆ هەر بەرمیلێک 121،18 دۆلارە.
بە کاریگەری هێرشی رووسیا بۆ سەر ئۆکرانیا لە 24/2/2022ـەوە، نرخی نەوت بەشێوەیەکی بەرچاو بەرزبووەتەوە، دوێنێ نرخی یەک بەرمیل نەوتی برێنت بە 130 دۆلار بوو، ئەمڕۆ بەراورد بە دوێنێ نەوت دابەزیوە.
لە سێ ساڵی رابردوو، یەکێک لە هۆکارە سەرەکییەکانی بەرزی و نزمی نرخی نەوت ڤایرۆسی کۆرۆنا بوو، لەگەڵ بەردەستبوونی ڤاکسین نرخی نەوت هەڵکشا و تاڕادەیەک ئابووری جیهان رووی لە بوژانەوە کردووە.
پێش هێرشی رووسیا بۆ سەر ئۆکرانیا شارەزایانی ئابووری پێشبینی ئەوەیان کردبوو، لەگەڵ کەمبوونەوەی ژمارەی تووشبووانی کۆرۆنا لە جیهان نرخی نەوت بۆ سەرووی 100 دۆلار بەرز دەبێتەوە.