کوڕێکی 15 ساڵ لەکاتی بەرگریکردن لە دایکی بە چەقۆ دەکوژرێت

K24 – هەولێر:

کوڕێکی تەمەن 15 ساڵان لە شاری مانچستەر، دوای ئەوەی کەسێك هێرش دەکاتە سەر ماڵەکەیان و پەلاماری خێزانەکەی دەدات، لەکاتی بەرگریکردن لە دایکی بە چەقۆی هێرشبەرەکە بریندار دەکرێت و دواتر لە نەخۆشخانە بەهۆی سەختی برینەکانیەوە گیان لەدەست دەدات.

بە گوێرەی هەواڵێكی وێبسایتی "زە سەن"، جاکوب شیمانسکی، قوتابیەکی 15 ساڵی دانیشتووی شاری مانچستەری بەریتانیا بووە و لەکاتی بەرگریکردن لە دایکی "کاترزینا باستێک" بە چەقۆی هێرشبەرەکەی بە سەختی بریندار دەکرێت، دواتر بە زوویی دەگەیەندرێتە نەخۆشخانە، بەڵام دوای کاتژمێرێک مانەوە لە نەخۆشخانە گیان لەدەست دەدات.

پاش چەند کاتژمێرێک لە رووداوەکە، پۆلیس دەستگیرکردنی گومانلێکراوێکی راگەیاند کە پیاوێکی تەمەن 44 ساڵ بوو، لێکۆڵەرانی کەیسەکە لەو بارەیەوە وتیان "جاکوب و دایکی گومانلێکراوەکە دەناسن".

جگە لە جاکوب، دایکیشی بە چەقۆ بریندار کراوە و لە نەخۆشخانەیە، بەڵام دۆخی تەندروستی جێگیرە.

خێزانی جاکوب لە لێدوانێکدا لەبارەی کوڕەکەیانەوە گوتیان، "ئەو منداڵێکی دڵ پاک و راستگۆ بوو، یارمەتی چەندین کەسی داوە، ئەو پاڵەوانی خێزانەکەمانە".