کەشناسی: خۆڵبارین بەردەوام دەبێت

پێشبینییەکانی کەشناسی بۆ کەشوهەوای هەرێمی کوردستان
دیمەنێکی خۆڵبارینی هەولێر
دیمەنێکی خۆڵبارینی هەولێر

K24 – هەولێر

بەگوێرەی پێشبینییەکانی کەشناسی کاریگەری تۆز و خۆڵبارین لەسەر ناوچەکانی هەرێمی کوردستان بەردەوام دەبێت و پلەی گەرما بەراورد بە رۆژانی رابردوو دادەبەزێت، بەڵام سبەی جارێکی دیکە پلەی گەرما بەرز دەبێتەوە.

بەڕێوەبەرایەتی کەشناسی و بومەلەرزەزانی هەرێمی کوردستان، پێشبینییەکانی بۆ کەشوهەوای 48 کاتژمێری داهاتوو بڵاوکردەوە بە بەپێی پێشبینییەکان، ئەمڕۆ ئاسمان بە گشتى ساماڵ دەبێت، لەگەڵ بوونى  توزێکى سووک، ئەگەرى زیادبوونى خێراى با لە سنوورى پارێزگاى سلێمانى هەیە، لە کاتەکانى ئێوارەدا پێشبینى بەرزبوونەوەى تۆز و خۆڵ لەسەر بەشێک لە ناوچەى جیا جیا دەکرێت بە ئاسـتێکى مامناوەند، بە تایبەتى لە سنوورى ئیدارەى گەرمیان و پارێزگاى کەرکووک و ناوچەکانى ترى باشوورى هەرێم.

سەبارەت بە کەشوهەوای سبەی کەشناسی پێشبینی دەکات، سبەی دووشەممە ئاسمان بەگشتی ساماڵ دەبێت، ئەگەرى بوونى تۆزێکى سووک هەیە لەسەر هەندێک ناوچە . پلەی گەرما بەراورد بە ئەمڕۆ بەرز دەبێتەوە بە نزیکەی 1 تــا 3 پلەی سیلیزی لەناوچە جیاجیاکاندا.

بەرزترین پلەکانی گەرمای پێشبینیکراو بە پلەی سیلیزی بەمشێوەیە دەبێت:.

هەولێر : 39

سڵێمانی: 37

دهۆک : 38

کەرکوک: 41

هەڵەبجە: 39

سۆران : 39

راپەرین: 40

گەرمیان: 43