ئه‌مه‌ریكا به به‌های 385 ملیۆن دۆلار چه‌ك ده‌فرۆشێته عومان
ئه‌مه‌ریكا ده‌ڵێت بۆ به‌هێزكردنی توانای سوپای سوڵتاننشینی عومانه
K24 – هه‌ولێر:
ئه‌مه‌ریكا ده‌ڵێت، گرێبه‌ستێكی له‌گه‌ڵ سوڵتاننشینی عومان واژوو كردووه و به گوێره‌ی گرێبه‌سته‌كه به به‌های 385 ملیۆن دۆلار چه‌ك ده‌فرۆشێته ئه‌و وڵاته.
ئاژانسی هاوكاری ئه‌منیی و به‌رگریی سه‌ر به وه‌زاره‌تی به‌رگری ئه‌مه‌ریكا، به‌یاننامه‌یه‌كی بڵاوكرده‌وه، تێیدا رایگه‌یاندووه، وه‌زاره‌تی ده‌ره‌وه رازی بووه، مووشه‌كی جی ئێس ئۆ ده‌بلیۆ و چه‌كوچۆڵی دیكه‌ی به‌رگری بفرۆشرێته سوڵتاننشینی عومان.
ئاژانسه‌كه راشیگه‌یاندووه، كۆنگرێس له‌و گرێبه‌سته ئاگادار كراوه‌ته‌وه.
به گوێره‌ی به‌یاننامه‌كه، ئه‌و چه‌كانه به به‌هێزكردنی توانای هێزی ئاسمانی سوڵتاننشینه‌كه‌یه و مه‌به‌ست لێی ئه‌وه‌یه عومان بتوانێت سنووری وشكانی و ئاوی و ئاسمانی وڵاته‌كه‌ی بپارێزێت.
تا ئێستا ده‌سه‌ڵاتی عومان هیچ روونكردنه‌وه‌یه‌كی له باره‌ی ئه‌و گرێبه‌سته بڵاو نه‌كردووه‌ته‌وه.
واژوو كردنی گرێبه‌سته‌كه له‌كاتێكدایه، ئه‌مه‌ریكا و عومان گفتوگۆیه‌كی ستراتیژییان ده‌ست پێكردووه، بۆ ئه‌وه‌ی عومان هاوكار بێت له درێژكردنه‌وه‌ی واده‌ی ئاگربه‌ستی یه‌مه‌ن و پابه‌ندبوونی به بژارده‌ی چاره‌سه‌ری دوو ده‌وڵه‌تیی بۆ كێشه‌ی فه‌له‌ستین.
عومان، وڵاتێكی كاناراویی ئارامه، له رووی ئه‌منی و سیاسییه‌وه، وڵاته‌كه بێ كێشه‌یه و له ماوه‌ی رابردووشدا رۆڵێكی گه‌وره‌ی گێڕاوه له نێوانگیری لایه‌نه ناكۆكه‌كانی یه‌مه‌ن و ته‌نانه‌ت ئه‌مه‌ریكا و ئێرانیشدا.