نێچیرڤان بارزانی: هه‌تا داویێ دێ له‌سه‌ر هه‌ولێن خۆ يێن رزگاركرنا ره‌ڤاندیێن ئێزیدی به‌رده‌وام بین
K24 – هه‌ولێر:
ب هه‌لكه‌فتا هاتنا جه‌ژنا رۆژی یا ئێزی، نێچیرڤان بارزانی، سه‌رۆكێ هه‌رێما كوردستانێ په‌یامه‌كه پیرۆزباهیێ راستی میرێ ئێزیدیان، بابه‌شێخ و جڤاتا رۆحانی و ته‌ڤایا ئێزیدیێن كوردستان و ئێراقێ و جیهانێ كر و هیڤی خوه‌ست، ئه‌ڤ جه‌ژن ببه ده‌ستپێكه‌ك ژبۆ ره‌وشه‌كه باش.
ته‌كستا په‌یاما پیرۆزباهیا سه‌رۆكێ هه‌رێما كوردستانێ ژبۆ جه‌ژنا رۆژی یا ئێزی:
جه‌ژنا رۆژى يێن ئێزى ل ڕێزدار ميرێ ئێزديان و بابه‌شێخ و جڤاتا ڕووحانى و هه‌مى خوشك و برايێن ئێزدى ل كوردستانێ و عيراقێ و ل هه‌ر ده‌ره‌كا جيهانێ بن، ژ دل و ب گه‌رمى پيرۆز دكه‌م. هيڤيدارم جه‌ژن و بێهنڤه‌دانا خۆ د ڕه‌وشه‌كا ته‌نا و ئارامدا ده‌رباز بكه‌ن و جه‌ژن و بيراهاتنێن بهێن، ژبۆ مه هه‌ميان د ڕه‌وشه‌كا باشتردا ڤه‌گه‌ڕن.
مخابن جه‌ژنه‌كا دى يا خوشك و برايێن مه يێن ئێزدى ڤه‌دگه‌ريت كو هێشتا هژماره‌كا مه‌زنا وان ئاوارانه و ژيانا زه‌حمه‌تا كه‌مپان دژين. دلێ مه دگه‌ل وانه و ئه‌م ژ نێزيك ئاگه‌هدارى ڕه‌وش و ژيارا وانين. پيرۆزباهييه‌كا تايبه‌ت ل وان هه‌ميان دكه‌م.
هه‌روه‌سا ب هزاران خوشك و برايێن مه ئێزدى، ب دله‌كێ كۆڤاندار ل هيڤيا زانينا چاره‌نڤيسێ كه‌سوكارێن خۆ يێن ڕه‌ڤانينه. ب ڤێ هه‌لكه‌فتنێ، ئه‌م ديسا هه‌مى خوشك برايێن خۆ يێن ئێزدى پشتڕاست دكه‌ين كو هه‌تا دويماهيێ دێ له‌سه‌ر كار و هه‌ولێن خۆ يێن ڕزگاركرن و دياركرنا چاره‌نڤيسێ ڕه‌ڤانديان به‌رده‌وام بين.
جه‌ژن ل هه‌ميان پيرۆز بيت، هه‌ر سال ب خير و خۆشى.
نێچيرڤان بارزانى
سه‌رۆكێ هه‌رێما كوردستانێ
2022/12/15