به‌وێنه‌.. جگه‌ له‌ كاولكاری.. بزانه‌ داعش له‌ فه‌للووجه‌ چی له‌دوای خۆی جێهێشتووه‌

K24 - هه‌ولێر:

ماوه‌ی دوو ساڵ چه‌كدارانی رێكخراوی داعش، فه‌للووجه‌یان له‌ژێر ده‌ستدا بوو، له‌ماوه‌ی ئه‌و دوو ساڵه‌دا، جیا له‌ بڵاوكردنه‌وه‌ی كولتووری توندوتیژی و كوشتن و سه‌ربڕین، كاولكارییه‌كی ته‌واوی ئه‌و شاره‌یان كردووه‌.

له‌دوای كۆنتڕۆڵكردنه‌وه‌ی ئه‌و شاره‌ له‌لایه‌ن سوپای عێراق و حه‌شدی شه‌عبی به‌ پاڵپشتی فڕۆكه‌ جه‌نگییه‌كانی هاوپه‌یمانی نێوده‌وڵه‌تی دژی داعش، رۆژانه‌ كاره‌ سه‌یره‌كانی رێكخراوه‌كه‌ وه‌ده‌رده‌كه‌ون.

سه‌رجه‌م قوتابخانه‌كانی ئه‌و شاره‌، وه‌كو كۆگایه‌كی چه‌ك و ته‌قه‌مه‌نی له‌لایه‌ن رێكخراوه‌كه‌ به‌كارهاتوون و له‌سه‌رجه‌م دیواری باخچه‌ی ساوایان و قوتابخانه‌كانیش، درووشمه‌كانی توندوتیژی  رێكخراوه‌كه‌یان بڵاوكردووه‌ته‌وه‌.

جگه‌ له‌ چه‌ند فه‌رمانگه‌یه‌كی حكوومی ئه‌و شاره‌، قه‌فه‌زی تایبه‌تییان بۆ به‌ندكردنی مرۆڤ لێداناوه‌.

هه‌روه‌ها ناوچه‌ی پیشه‌سازی شاره‌كه‌یان كردووه‌ته‌ كارگه‌ی دروستكردنی بۆمب و ئۆتۆمبێلی بۆمبڕێژكراوییان تێدا درووستكردووه‌.