رەوەند حوسێن: پلاتفۆڕمی خۆبەخش کوردستان دەبێتە هۆی وەگەرخستنی توانا شاراوەکانی گەنجان

K24 – هەولێر:

نوێنەری خۆبەخشان، رایدەگەیەنێت، پلاتفۆڕمی خۆبەخش کوردستان خزمەتێکی زۆر بە گەنجانی هەرێمی کوردستان دەکات، دەبێتە هۆی پەرەپێدان بە توانای گەنجان و دەرخستنی توانا شاراوەکانیان.

ئەمرۆ(22ـی حوزەیرانی 2023)، رەوەند حوسێن، نوێنەری خۆبەخشانی کوردستان، لە میانەی راگەیاندنی پلاتفۆڕمی خۆبەخش کوردستان، گوتی: بە هەوڵی دەستپێشخەری ئارین مەسرور بارزانی بیرۆکەی دروستکردنی پلاتفۆڕمی خۆبەخش کوردستان رادەگەیەندرێت.

هەروەها گوتیشی: کاری خۆبەخشی لە هەموو سێکتەرەکان پەرەیسەندووە کاریگەرییەکی ئەرێنی هەیە لە بەرەوپێشچوونی هەرێمی کوردستان، ئارین مەسرور بارزانی بەردەوامە لە دەستپێشخەری و پەرەپێدانی بیرۆکەی سەردەمیانە لە هەرێمی کوردستان.

نوێنەری خۆبەخشانی کوردستان، ئاماژەی بەوەدا، ئەم پڕۆژەیە لەخزمەتی بەتوانکردن ودەرخستنی توانا شاراوەکانی گەنجانی هەرێمی کوردستانە.

باسی لەوەشکرد، پلاتفۆڕمی خۆبەخش کوردستان دەبێتە گەورەترین و چالاکترین پلاتفۆرمی خۆبەخشی لەسەر ئاستی هەرێمی کوردستان.

گوتیشی: پلاتفۆڕمی خۆبەخش کوردستان، پردێکی هاوبەش لەنێوان رێکخراو و ئارەزوومەندانی کاری خۆبەخشی لە هەرێمی کوردستان دروستدەکات، هەروەها دەبێتە هۆی پەرەپێدان بە چالاکی بۆ بنیاتنانی کوردستانێکی بەهێزتر.

ئێوارەی ئەمڕۆ (22ـی حوزەیرانی 2023) پلاتفۆڕمی خۆبەخش کوردستان لەژێر دروشمی بەتواناکردنی خۆبەخشان و بەهێزکردنی کوردستان راگەیەندرا و وەک رێکخەرانی ئەو چالاکییە رایانگەیاند تێڕوانینیان لەم کارەدا بەهێزکردنی کوردستانە لە رێگەی هێزی کاری خۆبەخشییەوە.