لە کەرکووک نەشتەرگەری رێککردنەوەی رەگەزی بۆ گەنجێک ئەنجامدرا
K24 – کەرکووک:
لە نەشتەرگەرییەکی دەگمەندا لەسەر ئاستی عێراق، لە نەخۆشخانەیەکی حکومی کەرکووک، نەشتەرگەری رێککردنەوەی رەگەزی بۆ گەنجێکی تەمەن 19 ساڵ ئەنجامدرا و توانرا ئەندامی مێیینەی بگۆڕن بۆ ئەندامی نێرینە.
کەسوکارەکەی ئەم گەنجە چیرۆکی ژیانی ئەم گەنجەیان بۆ کوردستان24، گێڕایەوە و گووتیان، "ئەم گەنجە تاوەکو تەمەنی 14 ساڵی، وەکو کچێک گەورە بووە و جل و بەرگ و تەنانەت ناویشی کچانە بووە، لەگەڵ ئەوەشدا هەڵسوکەوت و حەزەکانی کوڕانە بوو".
بایسان لەوەشکرد، "کاتێک گەشتۆتە تەمەنی 14 ساڵی و سوڕی مانگانەی نەبووە، سەردانی پزیشکیان کردووە و لە پشکنیندا دەرکەوتووە کە کڕۆمۆسم و هۆڕمۆن و ئەندامەکانی ناوەوەی نێرینەن و لەبری منداڵدان و هێلەکەدان، گوونی هەیە و تەنها ئەندامی زاوزێی دەرەوەی مێینەیە".
حەیدەر وائیلی، پزیشکی پسپۆڕی نەخۆشی گورچیلە و میزەڕۆ، لەگەڵ تیمێکی پزیشکی نەشتەرگەرییەکەیان بۆ ئەم گەنجە ئەنجامداوە و دەڵێت: "ئەم حاڵەتە پێی دەوترێت نەشتەرگەری رێککردنەوەی رەگەزی، توانیویانە لەڕێگەی ئەو نەشتەرگەرییەوە گونی کە لە بەشی ناوەوەی جەستەیدا بووە بگوازرێتەوە بۆ دەرەوەی جەستەی و ئەندامی زاوزێی مێینەی بگۆڕن بۆ ئەندامی نێرینە، بەشێوەیەک کە دەتوانێ لەداهاتووشدا هاوسەرگیری ئەنجامبدات بەڵام توانای خستنەوەی منداڵی لاوازە".
هەروەها، ئەو پزیشکە پسپۆڕەی نەخۆشی گورچیلە و میزەڕۆ، ئاماژی بەوەشکرد، تەنیا لەماوەی شەش مانگی رابردوودا پێنج حاڵەتی لەم شێوەیەی بینیووە، بەڵام تەنیا ئەم نەشتەرگەرییەی ئەنجامداوە .
لەدوا پشکنینیدا لە شاری پزیشکی بەغدا، بریاردرابوو ئەم نەشتەرگەرییە لە دەرەوەی وڵات ئەنجامبدرێت، کە تێچووکەی 12 هەزار دۆلاربووە، بەڵام دواجار توانرا لە نەخۆشخانەی فێرکاری شاری کەرکووک نەشتەرگەرییەکە ئەنجامبدرێت.
