لە هەڵەبجە دوو تەرم بە دەست بەستراوی دۆزرانەوە
K24 – هەڵەبجە:
دوو تەرم لە گوندی چاوگ لە پارێزگای هەڵەبجە دۆزراونەتەوە کە گومان دەکرێت کوڕ و باوک بن و زیاتر لە 30 فیشەک بە جەستەیانەوە دیارە.
پەیامنێری کوردستان24 لە هەڵەبجە رایگەیاند، تەرمی دوو کەس رەوانەی پزیشکی دادی کراوە بە مەبەستی توێکاری بۆ ناسینەوەی ناسنامەیان و زانینی ماوەی کوشتنیان.
بەگوێرەی زانیارییەکانی کوردستان24 ئەو شایەتحاڵانەی سەرەتا چوونەتە سەر ئەو دوو تەرمە، ئاماژەیان بەوەکردووە، دوو کەسە کوژراوەکە یەکێکان تەمەنی سەروو 50 ساڵانە و ئەوەی دیکەیان نزیکەی 25 ساڵانە کە بە پەت دەستیان بەستراوەتەوە و شوێنەواری گوللـە بە جەستە و سەریانەوە دیارە.
هەروەها پەیامنێری کوردستان24 گوتیشی پێدەچێت چەند رۆژێک بێت ئەو رووداوە روویدابێت بەهۆی ئەوەی جەستەیان رەشبووەتەوە و شێوەیان تەواو ناناسرێتەوە.
هاوکات ئەوەشی خستەڕوو کە ناسنامەی دوو تەرمەکە ئاشکرابووە کە خەڵکی هەڵەبجەن بەڵام لەبارەی هۆکاری کوشتنیان و رووداوەکە، لێکۆڵینەوەکان دەستیان پێکردووە و وابڕیارە پۆلیسی هەڵەبجە بۆ رای گشتی زانیارییەکان بخاتەڕوو.
