وەزارەتی شارەوانی ڕێوشوێنەکانی بەرگریکردن لە لافاو تاوتوێ دەکات
K24 - هەولێر
وەزارەتی شارەوانی و گەشتوگوزاری حکومەتی هەرێمی کوردستان ڕێوشوێنەکانی بەرگریکردن لە لافاو لە پلانەکانیدا جێبەجێ دەکات.
ڕۆژی سێشەممە، 5ی ئەیلوولی 2023، بە سەرپەرشتیی ساسان عەونی و بەرپرس و ئەندازیارانی پەیوەندیدار، كۆبوونەوەیەك سەبارەت بە مەترسییەكانی لافاو و بەرپێگرتنی بەڕێوەچوو.
وەزارەتی شارەوانی و گەشتوگوزار لە راگەیەندراوێکدا بڵاویکردەوە: لە كۆبوونەوەكەدا دوو شیکاری سەبارەت بە شێوازی خۆپارێزی و دووركەوتنەوە لە مەترسییەكانی لافاو لە كاتی پلاندانان و نەخشەدانان و ئامادەكردنی ماستەرپلانی شار و شارۆچكەكاندا پێشكەش كران كە ئامانج لەو پرۆژەیە بۆ ئەوەیە ئەو بابەتانە بكرێنە بنەمایەك و سوودیان لێ وەربگیرێت لەو پرۆژانەی ئێستا كاریان لەسەر دەكرێت یان لە داهاتوودا دەكەونە بواری جێبەجێكردنەوە، بەتایبەتی لە كاتی هەمواركردنەوەی ماستەرپلانی شاری هەولێردا كە ئێستا وەزارەتی شارەوانی و گەشتوگوزار لەگەڵ ئاژانسی جایكای ژاپۆنی كار لەسەر هەمواركردنەوەی دەكەن.
ئەوەش خراوەتەڕوو: هەروەها پرێزنتەیشنەكانی بابەتەکە دەكرێنە بنەما بۆ ئەو ماستەرپلانانەی دووبارە دەست بە كارەكانیان دەكرێتەوە كە ساڵانێكە بەهۆی قەیرانی دارایییەوە لە شار و شارۆچكەكان وەستاون؛ لەو سۆنگەیەوە وەزارەتی شارەوانی و گەشتوگوزار دەیەوێت بابەتی خۆپارێزی لە مەترسییەكانی لافاو لەو ماستەرپلانانەی هەموار دەكرێنەوە یان ئامادە دەكرێن، بەهەند وەربگیرێت بۆ ڕووبەڕووبوونەوەی مەترسییەكانی لافاو و كۆبوونەوەی زیادەئاو لە سنووری شارەوانییەكان.