دوایین ئاماری دوو رۆژی رابردووی شەڕی نێوان ئیسرائیل و حەماس

K24 - هەولێر:

میدیاکانی ئیسرائیل بڵاویانکردەوە، ژمارەی ئەو ئیسرائیلیانەی لەماوەی دوو رۆژی رابردوودا لەلایەن گرووپە فەڵەستینییەکانەوە کوژران 700 کەسی تێپەڕاندووە، نزیکی دوو هەزار و 200 کەسیش بریندار بوون.

وەزارەتی تەندروستی فەڵەستینیش نوێترین ئاماری گیانلەدەستدانی بەهۆی بۆردومانەکانی سوپای ئیسرائیلەوە بۆسەر غەززە بڵاوکردەوە و ئاماژەی بەوەدا، تا ئێستا 470 کەس لە کەرتی غەززە کوژراون و زیاتر لە دوو هەزار و 100 کەسیش بریندارن.

تەندروستی فەڵەستین ئاماژەی بەوەشداوە، لەترسی بۆردومانەکانی ئیسرائیل 70 هەزار کەس لە غەززە پەنایان بۆ قوتابخانەکان بردووە.

هاوکات، پێکدادان لەنێوان سوپای ئیسرائیل و بزووتنەوەی حەماس لەناوچەکانی سیدۆرت و عەسقەلان و پێنج ناوچەی دیکەی کەناری غەززە بەردەوامە.

ئاژانسی رۆیتەرز ئاشکرایکردووە، ژمارەی ئەو ئیسرائیلیانەی لەلایەن گرووپە فەڵەستینییەکانەوە بەدیل گیراون 150 کەسی تێپڕاندووە و تا ئێستاش 700 ئیسرائیلیش بێسەروشوێنن.

رۆژی شەممە (7ـی تشرینی 2023) باڵی سەربازی بزووتنەوەی حەماسی فەڵەستینی لە کەرتی غەززەوە، زیاتر لە پێنج هەزار مووشەکی ئاراستەی ناوچەکانی ژێر دەسەڵاتی ئیسرائیل و ناوچە جولەکەنشینەکان کرد و ژمارەیەک چەکداری فەڵەستینیش تەلبەندی سنووری نێوان کەرتی غەززە و کۆمەڵگە جولەکەنشینەکانیان بڕی و لەگەڵ هێزە ئەمنییەکانی ئیسرائیل شەڕی کۆڵان بە کۆڵانیان دەستپێکرد.

لە بەرانبەردا، بنیامین ناتانیاهۆ، سەرۆکوەزیرانی ئیسرائیل جەنگی دژی حەماس و گرووپە چەکدارەکانی فەڵەستین راگەیاند و داوای لە دانیشتوانی غەززە کرد ناوچەکانیان چۆڵ بکەن، دواتریش سوپای وڵاتەکەی هێرشی زەمینی و ئاسمانی بۆ سەر غەززە دەستپێکرد.