سامان ره‌شید: گومانمان له ئامێره‌كانی ده‌نگدانی كه‌ركووك هه‌یه
K24 – هەولێر:
رێگه‌پێدراوی پارتی دیموكراتی كوردستان له كه‌ركووك ئاماژه به‌وه ده‌كات، گومانیان له ئامێره‌كانی ده‌نگدانی كه‌ركووك هه‌یه، ده‌شڵێت سكاڵایان له باره‌ی پێشێلكارییه‌كانی پڕۆسه‌ی ده‌نگدانی تایبه‌ت كردووه.
ئه‌مڕۆ (شه‌ممه 16ـی كانوونی یه‌كه‌می 2023) سامان ره‌شید، رێگه‌پێدراوی پارتی دیموكراتی كوردستان له كه‌ركووك تایبه‌ت به كوردستان24 رایگه‌یاند، پڕۆسه‌ی هه‌ڵبژاردنی ده‌نگدانی تایبه‌ت له كه‌ركووك به‌ده‌ر نه‌بوو له هه‌ندێك له پێشێلكاریی، به‌شێوه‌یه‌ك ئه‌وان وه‌ك به‌شی هه‌ڵبژاردنی پارتی دیموكراتی كوردستان سه‌باره‌ت به‌و پێشێلكارییانه چوار سكاڵایان تۆمار كردووه.
رێگه‌پێدراوی پارتی دیموكراتی كوردستان له كه‌ركووك هه‌روه‌ها ئاماژه‌ی به‌وه كرد، گومانیان له‌و ئامێرانه هه‌یه كه بۆ زانیاری ده‌نگه‌كان بۆ ناوه‌نده‌كان ده‌گوزانه‌وه. روونیشیكرده‌وه ئامێره‌كان وه‌ك پێویست نین و له گواستنه‌وه‌ی زانیارییه‌كان خاو و له‌سه‌ره‌خۆن.
سامان ره‌شید باسی له‌وه‌ش كرد، تاوه‌كو كاتژمێر هه‌شتی ئێواره‌ی ئه‌مڕۆ له هه‌ندێك بنكه‌دا داتاكان نه‌گه‌یه‌شتوونه‌ته به‌غدا، ئه‌مه‌ش گومانی له‌لای پارتی دیموكراتی كوردستان دروست كردووه.
له به‌شێكی دیكه‌ی قسه‌كانیدا گوتیشی، سه‌باره‌ت به‌و بابه‌ته له‌گه‌ڵ كۆمیسیۆن و ئه‌و لیژنه‌ی له به‌غداوه بۆ كه‌ركووك نێردراون قسه‌یان كردووه و پێیان راگه‌یاندوون هه‌ر چی زووه كێشه ته‌كنیكییه‌كان چاره‌سه‌ر بكرێت، به‌تایبه‌تی كه پێشتریش ئه‌و ئامێرانه چوار جار تێست كراون و ئه‌و كاتیش به كۆمیسیۆنیان راگه‌یاندبوو ئامێره‌كان وه‌ك پێویست كار ناكه‌ن.
كاتژمێر حه‌وتی به‌یانی ئه‌مڕۆ شه‌ممه 16ـی كانوونی یه‌كه‌می 2023، ده‌نگدانی تایبه‌تی هه‌ڵبژاردنی ئه‌نجوومه‌نی پارێزگاكانی عێراق ده‌ستیپێكرد و كاتژمێر شه‌شی ئێواره‌ی ئه‌مڕۆش كۆتاییپێهات.
وابڕیارە رۆژی دووشه‌مه 18ـی کانوونی یەکەمی ئەمساڵ، هەڵبژاردنی ئەنجوومەنی پارێزگاکانی عێراق (جگە لە پارێزگاکانی هەرێمی کوردستان) بەڕێوەبچێت کە زیاتر لە 16 ملیۆن كه‌س مافی ده‌نگدانیان لەو هەڵبژاردنە هەیە و کۆمیسیۆنی هەڵبژاردنەکانی عێراق ئامادەکاری کردووە بۆ کردنەوەی حەوت هەزار و 765 بنکەی ده‌نگدان کە لە 48 هەزار و 40 وێستگەی دەنگدان لەخۆدەگرێت، بۆ دەنگدانی گشتی، تایبەت و ئاوارەکان.
بەگوێرەی ئامارەکانی کۆمیسیۆنی باڵای هەڵبژاردنەکانی عێراقیش، بۆ هەڵبژاردنی ئەنجوومەنی پارێزگاکانی عێراق، ناوەندەکانی دەنگدان و وێستگەکان لەلایەن فەرمانبەرانی دەوڵەت و خوێندکارانی زانکۆ و دەرچووان بەڕێوەدەبرێن كه ژماره‌یان 214 هەزار و 595 کارمەندە.
رۆژی (31ـی تشرینی یەکەمی 2023) کۆمیسیۆنی باڵای هەڵبژاردنەکانی عێراق رایگەیاند، پێنج هەزار و 915 کاندید کێبڕکێ لە هەڵبژاردنی ئەنجوومەنی پارێزگاکان دەکەن کە چوار هەزار و 258 کاندیدیان لە رەگەزی نێرن و هەزار و 657 کاندیدیش لە رەگەزی مێن و لەمیانی پرۆسەی وردبینیکردن و بەدواداچوون، 357 کاندید لە کێبڕکێی هەڵبژاردن دوورخرانەوە.