خالید عه‌بدولئیلاهـ: عێراق پێویستی به هاوكاریی نه‌ته‌وه یه‌كگرتووه‌كانە
شرۆڤه‌كارێكی سیاسی ئاماژه به‌وه ده‌كات، یۆنامی پشتیوانی زۆری له عێراق كردووه، به‌تایبه‌ت له پێكهێنانی حكوومه‌ته یه‌ك له دوای یه‌كه‌كان له دوای ساڵی 2003ـوه.
سێشه‌ممه 4ـی حوزه‌یرانی 2024، خالید عه‌بدولئیلاهـ، شرۆڤه‌كاری سیاسی تایبه‌ت به كوردستان24 گوتی، ڕۆڵی نه‌ته‌وه یه‌كگرتووه‌كان له دوای ساڵی 2003 زۆر گرنگه و له چه‌ندان پرسدا جێپه‌نجه‌ی دیاره.
خالید عه‌بدولئیلاهـ ئاماژه‌ی به‌وه‌ش كرد، عێراق تا ئێسته پێویستی به هاوكاریی نه‌ته‌وه یه‌كگرتووه‌كان هه‌یه، به‌تایبه‌ت له بابه‌تی ژینگه و به‌بیابانبوون و ته‌كنه‌لۆجیای زانیاریی.
ناوبراو گوتیشی، حكوومه‌تی عێراق له قۆناغی داهاتوودا پێویستی به په‌ره‌پێدانی هاوكارییه‌كانه له‌گه‌ڵ نه‌ته‌وه یه‌كگرتووه‌كان.
ئه‌و شرۆڤه‌كاره سیاسییه باسی له‌وه‌ش كرد، عێراق ده‌توانێت له ده‌ره‌وه‌ی بابه‌ته سیاسییه‌كاندا، سوود له نه‌ته‌وه یه‌كگرتووه‌كان ببینێت.
سێشه‌ممه 4ـی حوزه‌یرانی 2024، محه‌ممه‌د شییاع سوودانی، سه‌رۆكوه‌زیرانی عێراق، له میانی دانیشتنێكی ئه‌نجوومه‌نی وه‌زیراندا ڕایگه‌یاند، بڕیاری ئه‌نجوومه‌نی ئاسایشی نێوده‌وڵه‌تی بۆ كۆتاییهاتنی ئه‌ركی یۆنامی له عێراق، له‌سه‌ر داوای عێراق بووه.
سه‌رۆكوه‌زیرانی عێراق ئاماژه‌ی به‌وه‌ش كرد، كۆتاییهاتنی ئه‌ركی یۆنامی له عێراق، به واته‌ی كۆتاییهاتنی په‌یوه‌ندییه‌كانی نێوان عێراق و ئاژانسه نێوده‌ڵه‌تییه تایبه‌تمه‌نده‌كان نییه.
ڕۆژی هەینی 31ـی ئایاری 2024، ئەنجوومەنی ئاسایشی نێودەوڵەتی، بە کۆی دەنگ، لەسەر داواکاریی حکوومەتی عێراق، بڕیاری دا لە کۆتایی ساڵی 2025، کۆتایی بە ئەرکی نێردەی نەتەوەیەکگرتووەکان لە عێراق (یۆنامی) بهێنێت.
ئەمەش دوای ئەوە دێت، 8ـی ئایاری ئەمساڵ، محەممەد شییاع سوودانی، سەرۆکوەزیرانی عێراق نامەیەکی ئاراستەی ئەنتۆنیۆ گۆتێرس، سکرتێری گشتیی نەتەوەیەکگرتووەکان و ئەنجوومەنی ئاسایشی نێودەوڵەتی کرد و داوای کردبوو کۆتایی بە ئەرکی یۆنامی لە عێراق بهێنرێت.
سوودانی داواشی کردبوو، ساڵی داهاتوو نەتەوەیەکگرتووەکان دەست بکات بە ڕێوشوێنەکانی داخستن و کۆتایی هاتنی ئەرکەکانی نێردەی نەتەوەیەکگرتووەکان لە عێراق تاوەکوو لە کۆتایی 2025، بە فەرمی کۆتایی بە ئەرکەکانی یۆنامی بهێنرێت.
زیاتر لە 20 ساڵە، یۆنامی لە عێراقدا کار دەکات و سەرۆکی نێردەکەش نوێنەری تایبەتیی سکرتێری گشتیی نەتەوەیەکگرتووەکانە و لە پرسە سیاسییەکاندا، ڕۆڵی هەبووە لە لێکنزیک بوونەوەی لایەنەکان و لە هەڵبژاردنەکانیشدا، وەک چاودێکی نێودەوڵەتیی هاوکاری حکوومەتی عێراق بووە.