محه‌مه‌دی مه‌لا كه‌ریم كۆچی دواییكرد

K24 - هه‌ولیر:

محه‌مه‌دی‌ مه‌لا كه‌ریم "حه‌مه‌ی مه‌لا كه‌ریم"  نوسه‌رو وه‌رگێڕی ناوداری كورد، كۆچی دواییكرد.

محه‌مه‌دی مه‌لا كه‌ریم له‌ 14/8/1931 له‌ ناوچه‌ی هه‌ورامان له‌دایكبووه‌، كوڕی زانای گه‌وره‌ی كورد، مه‌لا عه‌بدولكه‌ریمی موده‌ڕیسه‌، ساڵانێكی زۆره‌ نه‌خۆشه‌ و ئه‌مرۆ له‌ ته‌مه‌نی 86 ساڵیدا كۆچی دواییكردووه‌، و بڕیاره‌ له‌ شاری سلێمانی به‌خاك بسپێردرێت.

ئه‌و نووسه‌رو وه‌رگێڕێكی كورد بوو، خوێندنی لای باوكی و مه‌لای ناوچه‌كه‌یان ده‌ستپێكرد و دوای ئه‌وه‌ی هاتوونه‌ته‌ شاری سالێمانی، به‌رده‌وامی به‌ خوێندنداوه‌ و بووه‌ به‌ زانایه‌كی ئایینی.

محه‌مه‌دی مه‌لا كه‌ریم له‌ ساڵی 1953 بۆ 1954 به‌هۆی ئه‌وه‌ی له‌گه‌ڵ جوڵانه‌وه‌ی ئاشتی چالاكی نووانده‌ و كه‌سێكی كارابووه‌، له‌لایه‌ن حكومه‌تی پاشایه‌تی ئه‌و سه‌رده‌مه‌وه‌ ده‌ستگیركراوه‌.

له‌‌ساڵی 1949وه‌ ده‌ستی كردووه‌ به‌نوسین، ئه‌و سه‌رده‌مه‌  بابه‌ته‌كانی له‌ڕۆژنامه‌ی ‌( نه‌دا و ژین )دا بڵاوده‌كرده‌وه‌.

یه‌كه‌مین كتێبی له‌ ساڵی 1951 له‌ بواری ره‌خنه‌دا نووسیووه‌ و چه‌ندین كتێبی له‌ بواره‌كانی ، نه‌ته‌وه‌یی و ئایینی و سیاسی و شیعر و ئه‌ده‌بدا به‌چاپ گه‌یاندووه‌.

جگه‌ له‌وانه‌ له‌ بواری وه‌رگێران و لێكۆڵینه‌وه‌دا كاریكردووه‌ و بۆ لێكۆڵینه‌وه‌ و شیكردنه‌وه‌ی دیوانه‌كانی گه‌وره‌ شاعیرانی كورد، له‌گه‌ڵ مه‌لا عه‌بدولكه‌ریم موده‌ڕیسی باوكیدا كاریكردووه‌ و جێگه‌ی ده‌ستیان له‌ دیوانه‌كانی "نالی، سالم، كوردی، مه‌حوی"دا دیاره‌.