ھێزێكی پەكەكە ھێرشیكردە سەر تیمێكی دەزگای خێرخوازی بارزانی

K24 - شنگال

پەیامنێری كوردستان24 لە شنگال رایگەیاند: "ھێزێكی پەكەكە كە دەگوترێت جلی رەشیان لەبەر بووە، ھێرشیان كردووەتەسەر تیمێكی دەزگای خێرخوازی بارزانی".

ئاشتی كۆچەر، بەڕێوەبەری ئاسایشی شنگال بە كوردستان24 گوت: "ھێرشكردنە سەر دەزگای خێرخوازی بارزانی و موزایەدە لە ھیچ لایەنێك قبووڵ ناكەین".

بەڕێوەبەری ئاسایشی شنگال گوتیشی: "پێشتر زانیاریمان لەسەر ھێرشەكەی پەكەكە ھەبوو، بەداخەوە ئەوە چەندین جارە ئەو جۆرە پیلانە لە شنگال دەگێڕدرێن".

راشیگەیاند: "نامانەوێ ھیچ لایەنێك موزایەدە بەسەر خەڵكی شنگالەوە بكات، ئەگەر ئەوان لە دوای خەبات و خزمەتكردنن، سنووریان دیارە و دەتوانن بچن ئازادی بكەن".

مەحما خەلیل، قایمقامی شنگال بە كوردستان24 راگەیاند: "لە ماوەی رابردوو تا ئێستاش دەزگای خێرخوازی بارزانی بەھانای ھەموو پێكھاتەكانەوە چووە و بێ جیاوازی خزمەتی بە ھەموو لایەك كردووە".

گوتیشی: "چەندین جار بە فەرمی داوامان كردووە، پەكەكە شنگال چۆڵ بكات، شەرمە ھێرش بكرێتە سەر دەزگای خێرخوازی بارزانی، لە ھەرشوێنێك خەڵك لێ دەقەومێت ئەوان بە ھانایانەوە دەچن، لەماوەی رابردوو دەزگای خێرخوازی بارزانی، لەگەڵ خەڵكی شنگال ھاوكاری پەكەكەشیان كردووە، ئێمە ئەو كردەوەیە بە تێكدەرانە و پیلانی نەیارانی كورد دەزانین".

پیر ده‌یان، نوێنەری دەزگای خێرخوازی بارزانی لە شنگال گوتی: "ئێمە دەزگایەكی مرۆیین و ھیچ ئامانجێكی سیاسیمان نییە".

بە گوێرەی چەند شایەتحاڵێك: "ھێزەكەی پەكەكە ویستویانە ئاڵای كوردستان لەسەر بنكەی دەزگای خێرخوازی بارزانی لە شنگال بێنە خوارەوە، چەند كارمەندێكی لەوێ بوونە ئەوانیش رێگریان لەو ھەوڵەی پەكەكە كردووە و دواترھێزەكانی ئاسایشیان ئاگاداركردووەتەوە".