سیاسی

ئه‌نجامده‌ری هێرشه‌كه‌ی نیویۆرك ئۆزبه‌كستانییه‌

ئێستا له‌ نه‌خۆشخانه‌یه‌ و چاره‌سه‌ری بۆ ده‌كرێت

جیهان

K24 - هه‌ولێر:

میدیاكانی ئه‌مریكا رایانگه‌یاند "گومانلێكراوی هێرشه‌كه‌ی مانهاتنی شاری نیویۆرك، گه‌نجێكی ته‌مه‌ن 29 ساڵانه‌ و به‌ ره‌چه‌ڵه‌ك ئۆزبه‌كستانییه‌ و ساڵی 2010 هاتووه‌ته‌ ویلایه‌ته‌ یه‌كگرتووه‌كانی ئه‌مریكا".

تۆڕی هه‌واڵی سی ئێن ئێن، له‌ زاری به‌رپرسانی ئه‌مریكییه‌وه‌ بڵاویكردوه‌ته‌وه‌ كه‌ "پۆلیس گومانلێكراوه‌كه‌ی ده‌ستگیركردووه‌و ئێستا له‌ نه‌خۆشخانه‌ چاره‌سه‌ری ده‌كه‌ن".

به‌رپرسان ده‌ڵێن: "وه‌ك رووداوێكی تیرۆریستی لێكۆڵینه‌وه‌ له‌ رووداوه‌كه‌ ده‌كه‌ین، شایه‌تحاڵه‌كانیش گومانلێكراوه‌كه‌یان بینیووه‌ كاتێك هێرشه‌كه‌ی ئه‌نجامداوه‌ "الله أكبر"ـی گوتووه‌.

بیل دی پلازیۆ، گه‌وره‌ شاره‌داری نیویۆرك ده‌ڵێت: "8 كه‌س گیانیان له‌ ده‌ستداوه‌و 12 كه‌سی دیكه‌ش بریندار بوون، هێرشه‌كه‌ به‌هۆی خۆپێداكێشانی ئۆتۆمبێل ئه‌نجامدراوه‌و ئۆتۆمبێله‌كه‌ش له‌و جۆره‌یه‌ كه‌ كه‌لوپه‌لی پێ ده‌گوازرێته‌وه‌، ئه‌نجامده‌ره‌كه‌ ئۆزه‌به‌كستانییه‌كی دانیشتووی ویلایه‌تی فلۆریدایه‌".

رووداوه‌كه‌ له‌ گه‌ڕه‌كی مانهاتنی به‌ناوبانگ، له‌ ناوه‌ڕاستی نیویۆرك روویداوه‌و خۆی به‌ ژماره‌یه‌ك پاسكیلسواردا كێشاوه‌.

کوردستان24 دیجیتاڵ میدیا ,