ئه‌مشه‌و له‌ ئیتاڵیا كلاسیكۆیه‌كی ئاگرین به‌ڕێوه‌یه‌

ئه‌مشه‌و ھەوادارانی تۆپی پێ چاویان لەسەر یەکێک لە یارییە بەھێزەکانی کالچیۆ دەبێت، کاتێک یاریگەی یۆڤێنتۆس ئەرێنا لە شاری تۆرینۆ دەبێتە شانۆی رووبەرووبونەوەی نێوان یۆڤێنتۆس و رۆما لە میانی لوتکەی یارییەکانی گەڕی 18ـی خولەکە.

دوای تێپەڕبوونی 17 گەڕ، خانمە پیرەکە بە 41 خاڵ دوای ناپۆلی دێت و ریزبەندی دووەمی گرتووە، گورگەکانیش بە 38 خاڵ لە سێیەمی خولەکەیە، یۆڤی بەبردنەوەی فشارەکانی سەر ناپۆلی پێشەنگ زیاتر دەکات، رۆماش بەدەستخستنی سەرکەوتن ئەوا خاڵەکانی لەگەڵ یۆڤێنتۆس ھاوتادەکاتەوە.

 ئەمەی خوارەوە گرنگترین ژمارە و ئامارەکانی ھەردوو یانەیە:

ـ لەدوایین 10 یاری، یۆڤێنتۆس لە شەش یاری بردنەوەی تۆمار کردووە، رۆماش لە دوو یاری براوە بووە، لە یارییەکیش یەکسانبوونە.

ـ لە کالچیۆ، یۆڤێنتۆس زۆرترین جار لە رۆمای بردووەتەوە، 79 بۆ یۆڤی، 39 بۆ رۆما، 48 یاریش یەکسانبوون.

ـ یۆڤێنتۆس لە کۆی 24 یاری لەگەڵ رۆما، لە 23 یاری گۆڵی تۆمار کردووە، لەو 23 یارییە لە 15ـیان براوە بوو، لە پێنج یاریش یەکسانبووە، لە 4 یاریش شکست بووه‌ته‌ به‌شی.

ـ یۆڤێنتۆس بەرانبەر بە رۆما خاوەنی زۆرترین سەرکەوتنی یەک لەدوای یەکە لەسەر  یاریگەی خۆی کە شەش یارییە، ھاوکات لەچواریان تۆڕی گۆڵەکەی نەھەژێندراوە.

ـ لەم وەرزە خانمە پیرەکە دوای 17 گەڕ خاوەنی 44 گۆڵە، بەمەیش ژمارە پێوانەییەکەی خۆی شکاند دوای 17 گەر لەوەرزی 1959 - 1960.

ـ لەم وەرزەدا ھێلی بەرگری رۆما خاوەن ژمارەیەکی تایبەتە، ئەم یانەیە لە سێ یاریدا رێگەی نەداوە تەنانەت تۆپێکیش ئاراستەی گۆڵەکەی بکرێت.

ـ دزیکۆ لە دوایین 10 یاریدا تەنھا گۆڵێکی تۆمار کردووە، ئەمە لەکاتێکدایە پێش ئەو 10 یارییە ولە پێنج یاریدا 7 گۆڵی کردووە.

ـ بیانیچ لەگەڵ رۆما بەر لە پەیوەندیکردنی بە یۆڤی 159 یاری لە خولی ئیتاڵی ئەنجامداوە، تێیدا 27 گۆڵی تۆمارکردووە کە 14 گۆڵیان لە رێگەی لێدانی راستەوخۆ بووە.

ـ پاولۆ دیبالا لە ساڵی 2017 بە 38 یاری خاوەن زۆرترین بەشداریکردنە لە خولی کالچیۆ.

ئاماده‌كردنی: لوقمان عەلی