"به‌هۆی مێسی، ئه‌ستێره‌یه‌كی ریال مه‌درید هه‌ڕه‌شه‌ی ده‌ركردنی له‌سه‌ره"
له دوای كلاسیكۆ، زێدان و پێرێز ره‌خنه‌ی توندیان له‌م یاریزانه گرتووه
.jpg)
كاردانه‌وه‌ی شكسته‌كه‌ی یانه‌ی ریال مه‌درید له كلاسیكۆ به‌رده‌وامه، میدیاكان له دوای ئه‌م رووداوه ره‌حم به راهێنه‌ر و یاریزانانی ریال مه‌درید ناكه‌ن، له ئێستا جگه له كه‌ریم بێنزێما ره‌خنه‌كان به ئاراسته‌ی مارسێلۆ شكاوه‌ته‌وه.
ئه‌مرۆ سێشه‌ممه 27 دێسێمبه‌ری 2017، پێگه‌ی ماركای ئیسپانیا زانیاری ئه‌وه‌ی ده‌ستكه‌وتووه كه راهێنه‌ر و ده‌سته‌ی هونه‌ری یانه‌ی ریال مه‌درید گله‌یی توندیان له مارسێلۆی به‌رگریكاری به‌رازیلی كردووه كه ئاستی له كلاسیكۆ خراپ بووه و له به‌رامبه‌ر راگرتنی لیۆنێل مێسی ـیش زۆر لاواز بووه.
به گوێره‌ی هه‌مان سه‌رچاوه، زێدان له په‌یامێكی توند مارسێلۆی به دانیشتن له‌سه‌ر كورسی یه‌ده‌گ ترساندووه و ئاگاداركردۆته‌وه كه ماوه‌ی چه‌ند یارییه‌كه ئاستی دابه‌زیوه و هۆشداری داوه‌تێ كه ئاستی خۆی پێشبخات.
رۆژنامه‌ی ماركا ئاماژه‌ی بۆ ئه‌وه‌ش كردووه كه زینه‌دین زێدان راهێنه‌ری یانه‌ی ریال مه‌درید و فلۆرێنتینیۆ پێرێزی سه‌رۆك كۆبوونه‌وه‌یان له باره‌ی خاڵه لاوازه‌كانی یانه‌كه كردووه و له‌سه‌ر گواستنه‌وه‌ی چه‌ند ئه‌ستێره‌یه‌كیش رێككه‌وتوون.
