میدیای توركیا: سوپا شارەدێی راجۆی لە عەفرین كۆنترۆڵكرد

K24 - ھەولێر

بە گوێرەی میدیای توركیا سوپای ئەو وڵاتە شارەدێی راجۆی سەر بە عەفرینی كۆنترۆڵكردووە.

ئاژانسی ھەواڵی ئەنادۆڵ بڵاویكردوە: "سوپای توركیا و چەكدارانی سوپای ئازادی سووریا، شارۆچكەی راجۆی سەر بە ئەفرینیان كۆنترۆڵكرد".

ئەوەش راگەیەندراوە، شەڕ و پێكدادان لە دەوروبەری راجۆ بەردەوامە.

تائێستا یەكینەكانی پاراستنی گەل (یەپەگە) كۆنترۆڵكردنی راجۆی لەلایەن سوپای توركیا پشتڕاست نەكردووەتەوە و ئاژانسی ھاواری نزیك لە پەیەدە رایگەیاندووە: "لە دەوروبەری راجۆ شەڕی سەخت لەنێوان شەڕڤانان و سوپای توركیا لەئارادایە".

شارەدێی راجۆ كەوتووەتە باكووری رۆژئاوای عەفرین و لەسەرەتای ھێرشەكانی توركیا بۆسەر عەفرین و دەوروبەری سوپای توركیا چەندین ھێرشی بۆ داگیركردنی ئەو شارەدێیە داوە و لەلایەن شەڕڤانانی یەپەگە تێكشكێندراوە.

زیاتر لە مانگێكە ھێرشی سوپای توركیا بۆسەرعەفرین بەردەوامە و بە گوێرەی ئاماری ئەنجوومەنی تەندروستی ئەو شارە تائێستا نزیكەی 200 كەسی سڤیل شەھید بوونە و زیاتر 550 كەسی دیكەش برینداربوونە.

H.M