سیاسی

ستایشی شازاده‌ی سعوویه‌ بكه‌ و زیاتر له‌ 5 هه‌زار دۆلار به‌ده‌ست بهێنه‌

میدیاكارانی سعوودیه‌ ئه‌و كه‌سه‌ خه‌ڵت ده‌كه‌ن كه‌ باشترین كۆمێنت له‌سه‌ر وێنه‌كه‌ی شازاده‌ محه‌مه‌د بن سه‌لمان له‌ به‌ریتانیا ده‌نووسێت

ڕۆژهەڵاتی ناوەڕاست

K24- هه‌ولێر:

نه‌ك ته‌نیا شه‌قامه‌كانی شاری له‌نده‌ن، به‌ڵكو له‌سه‌ر تۆڕه‌ كۆمه‌ڵایه‌تییه‌كانیش سه‌ردانی محه‌مه‌د بن سه‌لمان، شازاده‌ی جێنشینی سعوودیه‌ بۆ به‌ریتانیان بووه‌ته‌ بابه‌تی گه‌رم، تۆڕی تویته‌ریش له‌ مانشێته‌كانی بن سه‌لمان بێبه‌ش نه‌بووه‌، به‌تایبه‌ت كه‌ له‌و تۆڕه‌ ده‌ست به‌ هه‌ڵمه‌تێكی هه‌ڕمێنكردن كراوه‌، بۆ هه‌ركه‌سێك كه‌ باشترین كۆمێنت له‌سه‌ر ئه‌و وێنه‌یه‌ی بن سه‌لمان بنووسێت كه‌ له‌به‌ریتانیا گرتوویه‌تی، خه‌ڵاتێكی دارایی ئاماده‌ كراوه‌.

به‌ده‌یان راگه‌یه‌ندكاری نزیك له‌ ده‌سه‌ڵاتی سعوودیه‌ به‌شدارییان له‌و هه‌ڵمه‌ته‌ی ره‌واجدان به‌ سه‌ردانه‌كه‌ی بن سه‌لمان بۆ به‌ریتانیا كردووه‌، كه‌ ماوه‌ی 3 رۆژی خایاندبوو، به‌شێك له‌ میدیاكاران رایانگه‌یاندووه‌، هه‌ركه‌سێك كه‌ بیه‌وێت خه‌ڵاتێكی دارایی باش به‌ده‌ست بهێنێت، پێویسته‌ به‌جوانترین دێره‌ شعر یاخۆد سه‌رنجڕاكێشترین كۆمێنت به‌شداری بكات.

وه‌ك راشگه‌یه‌نداروه‌، خه‌ڵاتی دیاریكراو له‌ 500 ریال ده‌ستپێ ده‌كات و تا 20 هه‌زار ریالی سعوودی ده‌ڕوات، كه‌ ده‌كاته‌ زیاتر له‌ 5300 دۆلاری ئه‌مه‌ریكی، بۆ ئه‌و وێنه‌یه‌ی كه‌ بن سه‌لمان له‌ له‌نده‌ن گرتوویه‌تی كاتێك له‌ ئۆتۆمۆبیله‌كه‌ی داده‌به‌زێت.

سه‌ره‌تا نه‌واف بن عاسی، كه‌ ئه‌ندامی یانه‌ی ئه‌هلی سعوودییه‌، رایگه‌یاندبوو، خه‌ڵاته‌كه‌ له‌ 10 هه‌زار ریال پێكهاتووه‌، به‌ڵام دوای كارلێكی گه‌وره‌ی ئه‌و هه‌ڵمه‌ته‌ له‌ تویته‌ر، بن عاسی خه‌ڵاته‌كه‌ی بۆ 20 هه‌زار ریال به‌رز كرده‌وه‌، به‌ مه‌رجێك ئه‌و كه‌سه‌ی وه‌سفی وێنه‌كه‌ ده‌كات، به‌ هه‌زاران كۆمێنت له‌سه‌ر ئه‌و وه‌سفه‌ به‌دوای خۆیدا بهێنێت، و ژماره‌ی كۆمێنته‌كان گه‌یشتوونه‌ته‌ زیاتر له‌ 7 هه‌زار كۆمێنت، زۆربه‌شیان ستایشی شازاده‌یان كردووه‌.

دواتر بن عاسی به‌ كۆمێنتێك گه‌ڕایه‌وه‌ و رایگه‌یاند، ئه‌و 20 هه‌زار ریاله‌ به‌سه‌ر 4 كه‌سدا دابه‌شكراوه‌، كه‌ باشترین 4 كۆمێنتیان له‌سه‌ر وێنه‌كه‌ نووسیبوو و، هه‌ریه‌كه‌یان 5 هه‌زار ریالی سعوودییان به‌ده‌ست هێناوه‌.

ئه‌مه‌ش له‌كاتێكدایه‌، به‌شێك له‌ چالاكوانان له‌ كۆمێنته‌كانیاندا نووسیویانه‌، ئه‌مه‌ش جۆرێكی دیكه‌ی ته‌پڵه‌ لێدانه‌ بۆ پێداهه‌ڵدان به‌ شازاده‌ی جێنشینی سعوودیه‌ و، ره‌خنه‌ی توندیان ئاراسته‌ی ئه‌و ره‌واجدانه‌ به‌ بن سه‌لمان كردووه‌.

محه‌مه‌د بن سه‌لمان، له‌ 7ی ئه‌م مانگه‌ سه‌ردانی له‌نده‌نی پایته‌ختی به‌ریتانیای كرد و، له‌گه‌ڵ چه‌ندین به‌رپرسی باڵای ئه‌و وڵاته‌ كۆبۆوه‌، هاوكات پێشوازیكردنی بن سه‌لمان له‌لایه‌ن به‌رپرسانی شانشینی به‌ریتانیاوه‌، ره‌خنه‌ و ناڕه‌زایه‌تی توندی به‌دوای خۆیدا هێنا و، چه‌ندین خۆپیشاندان و گردبوونه‌وه‌ شه‌قامه‌كانی له‌نده‌نی گرته‌وه‌، به‌وه‌ی كه‌ سعوودیا ته‌واوی ماف و ئازادییه‌كان له‌به‌رچاو ناگرێت و، یه‌كسانی له‌نێوان ئافره‌ت و پیاوی ئه‌و وڵاته‌دا نییه‌.

H.B

کوردستان24 دیجیتاڵ میدیا ,