ترەمپ و ئەردۆغان دۆخی سووریا تاوتوێ دەكەن

K24 - ھەولێر

سەرۆكی ویلایەتە یەكگرتووەكانی ئەمریكا و سەرۆك كۆماری توركیا، لە پەیوەندییەكی تەلەفۆنیدا، تاوتوێی دوایین گۆڕانكارییەكانی دۆخی سووریایان كرد.

سەرچاوەیەك لە سەرۆكایەتی كۆماری توركیا بڵاوی كردووەتەوە: "رەجەب تەیب ئەردۆغان، سەرۆك كۆماری توركیا پەیوەندییەكی تەلەفۆنی لەگەڵ دۆناڵد ترەمپ، سەرۆكی ئەمریكا ئەنجامداوە و ھەردوولا بیرۆراكانیان لەبارەی دوایین گۆرانكارییەكانی سووریا ئاڵوگۆڕ كردوون". بێ ئەوەی زانیاری زیاتر لەبارەی پەیوەندییە تەلەفۆنییەكەی نێوان ترەمپ و ئەردۆغان بدركێنێت.

ئەو پەیوەندییە تەلەفۆنییە، دوای ئەوە دێت كە دوێنێ ترەمپ ھۆشداریی دایە رووسیا و رایگەیاند، بە مووشەكی نوێ و زیرەك ھێرش دەكەنە سەر سووریا.

ترەمپ راشگەیاند: "پێویسته‌ رووسیا نه‌بێته‌ هاوبه‌ش له‌گه‌ڵ گیاندارێكی مرۆڤ كوژ (وه‌ك ئاماژه‌ بۆ به‌شار ئه‌سه‌د، سه‌رۆكی سووریا) كه‌ به‌ گازی كیمیایی خه‌ڵكه‌كه‌ی خۆی ده‌كوژێت و به‌ كوشتنیان دڵخۆشه‌".

ھەڕەشەكانی ئەمریكا لە رژێمی بەشار ئەسەد، دوای ئەوەدێت، كە لە رۆژی 7/4/2018 هێزەکانی سەر بە حکوومەتی سووریا بە گازی ژەهراوی شاری دومایان لە ناوچەی غوتەی رۆژهەڵات بۆردوومانکردووە، کە لەژێر دەستی چەکدارانی جەیشولئیسلامی ئۆپۆزسیۆنی سووریایە.

ھ.م