كوژرانی "مشكه‌ بچووكه‌كه‌" كۆتایی به‌غدادی نزیكتر ده‌كاته‌وه‌

شانه‌ی "هه‌ڵۆ"ـی هه‌واڵگریی عێراق، ورده‌كاریی نوێی له‌باره‌ی كوژرانی كوڕه‌كه‌ی ئه‌بو به‌كر به‌غدادی رێبه‌ری داعش ئاشكرا كردووه‌ كه‌ له‌ سووریا كوژرا. له‌وباره‌وه‌ ده‌ڵێن: "حوزه‌یفه‌ به‌دری" كه‌ به‌ مشكه‌ بچووكه‌كه‌ ناسراوه‌ له‌و شوینه‌ی كوژراوه‌، 11 سه‌ركرده‌ی داعشی له‌گه‌ڵدا بووه‌و ئه‌وانیش كوژراون".

شانه‌ هه‌واڵگرییه‌كه‌ ده‌ڵێت: "له‌ ماوه‌ی سێ مانگی دیكه‌دا به‌غدادی رێبه‌رایه‌تی داعش له‌ ده‌ست ده‌دات، پاش ئه‌وه‌ی ته‌ئكیدكراوه‌ته‌وه‌ كه‌ به‌هۆی گورزێكی هێزه‌كانی عێراقه‌وه‌ له‌ رۆژی 22/6/2017 بریندار بووه‌. ئێستاش رێكخراوی داعش له‌ناو دۆخێكی خراپدان و ناكۆكی و جیابوونه‌وه‌ له‌ناو ریزی سه‌ركرده‌كانی زیادیكردووه‌ و ناچارن له‌و ماوه‌یه‌دا جێگره‌وه‌ی به‌غدادی دیاری بكه‌ن".

به‌گوێره‌ی زانیارییه‌كانی ئه‌و شانه‌ هه‌واڵگرییه‌، حوزه‌یفه‌ی كوڕی به‌غدادی نه‌ ئینغماسی بووه‌و نه‌ چه‌كداری داعشیش بووه‌، به‌ڵكو ته‌نها له‌ رووی سیمبولی و وه‌ك بانگه‌شه‌یه‌ك بۆ به‌رزكردنه‌وه‌ی مۆراڵی چه‌كداره‌كانی رێكخراوه‌كه‌ ناوبه‌ناو لێره‌ و له‌وێ ده‌ركه‌وتووه‌و گواستوویانه‌ته‌وه‌. به‌ڵام "مشكه‌ بچووكه‌كه‌" له‌ناو كون و ناو به‌رده‌ڵانه‌كاندا هاتووه‌و چووه‌".

حوزه‌یفه‌ له‌ شاری حمسی سووریا، به‌هۆی بۆمبابارانی رووسه‌كان كوژراوه‌و له‌وكاته‌شدا 11 سه‌ركرده‌ی دیكه‌ی له‌گه‌ڵدا بووه‌.