سەرۆك بارزانی: دەبێ ئافرەت لە بەهێزكردنی كوردستان رۆڵی كارای ھەبێت

K24 - ھەولێر

سەرۆك مەسعود بارزانی، بەبۆنەی سەركەوتنی كۆنگرەی ھەشتەمی یەكێتی ئافرەتانی كوردستان پەیامێكی پیرۆزبایی ئاراستەی یەكێتی ئافرەتان دەكات و رایدەگەیەنێت، دڵنیام كە یەكێتیی ئافرەتانی كوردستان هەر وەك قۆناغەكانی پێشووتری خەباتی گەلەكەمان رۆڵێكی كاریگەری دەبێت لە بەرەوپێشبردنی دۆزی رەوای گەلەكەمان و بەرگریكردن لە ماف و داخوازییەكانی ئافرەتان.

لە پەیامەكەی سەرۆك بارزانی بۆ یەكێتی ئافرەتان ھاتووە: "لە قۆناغی ئێستادا ئەركی ئێوە لەڕووی هۆشیاریی نیشتیمانی و پێگەیاندنی ئافرەتان و داكۆكیكردن لە مافە مەدەنی و سیاسییەكانی ئافرەتان زۆر گرنگە و دەبێ لە ئاراستەی بەهێزكردنی كوردستان و بەشداریكردنی كارای ئافرەت لە ژیانی گشتیی كۆمەڵگەی كوردستاندا بێت".

دەقی پەیامی سەرۆك بارزانی بۆ یەكێتی ئافرەتانی كوردستان

بەناوی خودای بەخشندە و میهرەبان

بەبۆنەی سەركەوتنی كۆنگرەی هەشتەمی یەكێتیی ئافرەتانی كوردستان گەرمترین پیرۆزبایی خۆم ئاراستەی ئەندامان و بەڕێوەبەرانی كۆنگرەكە دەكەم و هاوكاتیش پیرۆزبایی لە هەموو ئافرەتانی كوردستان و ئەندام و كادیرانی یەكێتیی ئافرەتانی كوردستان دەكەم.

بە پێویستی دەزانم دەستخۆشی و پێزانینی خۆم ئاراستەی سەركردایەتیی پێشووی یەكێتیی ئافرەتانی كوردستان بكەم و پیرۆزباییش لەو خوشكە بەڕێزانە دەكەم كە متمانەی كۆنگرەی هەشتەمیان پێ بەخشراوە بۆ سەركردایەتیكردنی یەكێتیی ئافرەتانی كوردستان.

دڵنیام كە یەكێتیی ئافرەتانی كوردستان هەر وەك قۆناغەكانی پێشووتری خەباتی گەلەكەمان رۆڵێكی كاریگەری دەبێت لە بەرەوپێشبردنی دۆزی رەوای گەلەكەمان و بەرگریكردن لە ماف و داخوازییەكانی ئافرەتان. لە قۆناغی ئێستادا ئەركی ئێوە لەڕووی هۆشیاریی نیشتیمانی و پێگەیاندنی ئافرەتان و داكۆكیكردن لە مافە مەدەنی و سیاسییەكانی ئافرەتان زۆر گرنگە و دەبێ لە ئاراستەی بەهێزكردنی كوردستان و بەشداریكردنی كارای ئافرەت لە ژیانی گشتیی كۆمەڵگەی كوردستاندا بێت.

هیوای سەركەوتنتان بۆ دەخوازم

مسعود بارزانی

6ـی 9ـی2018