کەمال کەرکووکی: بەبێ ئاڵای کوردستان ناچینەوە کەرکووک

K24 – هه‌ولێر:

ئەمڕۆ یەکشەممە 30/12/2018، بەشێک لە لایەنە سیاسییەکانی ھەرێمی كوردستان بۆ تاوتوێکردنی دۆخی کەرکووك لە ھەولێر کۆبوونەوە و دوا بە دوای ئەوەش کەمال کەرکووکی، بەرپرسی ئەنجوومەنی سەرکردایەتی پارتی دیموکراتی کوردستان لە کەرکووک- گەرمیان رایگەیاند، ئەوان بەبێ ئاڵای کوردستان و کشانەوەی سوپا و حەشدی شەعبی ناگەڕێنەوە کەرکووک.

لە کۆنگرەیەکی رۆژنامەوانیدا، کەمال کەرکووکی رایگەیاند: " کەرکووک داگیرکراوە و دەبێت ئاسایی بکرێتەوە، دەبێت مەلەفی ئیداریی و ئەمنی کەرکووک رادەستی خەڵکی کەرکووک و هێزە خۆ جێیەکان بکرێت".

سەبارەت بە دەستنیشانکردنی پارێزگاری کەرکووک، کەمال کەرکووک گووتی: "دەستنیشانکردنی پارێزگار هیچ سوودێکی نابێت چونکە مەلەفی ئەمنی لای پارێزگا نییە و کەرکووک بووەتە سەربازگەیەکی گەورە".

ئەو بەرپرسەی پارتی ئاماژەی بەوەش دا کە بەرپرسانی هەرێم لەگەڵ بەغدا و هاوپەیمانان لە گفتوگۆدان بۆ ئاسایی کردنەوەی بارودۆخی کەرکووک بۆ ئەوەش هەنگاوی باش نراوە.

H.J