سەرۆک بارزانی سەرەخۆشی لە کەسوکاری قوربانیان و دانیشتووانی شاری مووسڵ دەکات

K24 – هه‌ولێر:

بە هۆی نقومبوونی بەلەمێکی گەشتیاریی و گیان لەدەستدانی زیاتر لە 70 کەس لە شاری مووسڵ، سەرۆک بارزانی سەرەخۆشی لە کەسوکاری قوربانیان  و دانیشتووانی شاری مووسڵ دەکات.

ئەمڕۆ پێنجشەممە 21/03/2019، بە هۆی نقومبوونی بەلەمێکی گەشتیاریی لە شاری مووسڵ، زیاتر لە 70 کەس گیانیان لە دەست دا و بە دەیانی دیکەش هێشتا بێسەروشوێنن.

دەقی سەرەخۆشییەکەی سەرۆک بارزانی بۆ رووداوەکەی شاری مووسڵ:

بەناوی خودای مەزن و دلۆڤان

بەداخێکی زۆرەوە لە ڕۆژی پێنجشەممە 21/03/2019 لە ئاکامی نقومبوونی بەلەمێک لە ڕووباری دیجلە لە شاری موسڵ ژمارەیەکی زۆری هاووڵاتیان بوونەتە قوربانی.

بەم بۆنە خەمناکەوە سەرەخۆشی و هاوخەمیی خۆم ئاراستەی کەسوکاری قوربانیانی ئەو ڕووداوە دڵتەزێنە و دانیشتوانی شاری موسڵ دەکەم. لە خودای گەورە داواکارم سەبر و ئارامی بە کەسوکاری گیانلەدەستدراوان ببەخشێت و هیوای چاکبوونەوە بۆ برینداران و دۆزینەوەی ونبووان دەخوازم،

مسعود بارزانی

21/032019

 H.J