پیاوێك زیاتر لە 70 ساڵە نان بە بەرد پەیدا دەكات
حاجی كەریم 30 نەوەی خۆی فێری بەردتاشی دەكات
K24 - سلێمانی
یەکێکە لە نەقاڕە ھەرە کۆنە تاشە بەردەکانی دەوربەری سلێمانی، تا ئێستا زیاتر لە 30 نەوەی خۆی ھێناوەتە ناو پیشەکە و رۆژ تائێوارە تاشە بەردەکان بە ماندوو بوونێکی زۆر نەقاڕ دەکەن.
حاجی کەریم، رۆژ تا ئێوارە چەکوشێک لەنێو لەپی دەستە لەرزۆکەکانییەتی و نەقاڕی تاشە بەردەکان دەکات. چاوەکانی روویان لەکزبوونکردووە و ئەژنۆکانی ھێزی جارانیان لەبەر بڕاوە، بەڵام ئەو ھێشتا دەست بەرداری پیشە حەفتا ساڵانەکەی نەبووە.
حاجی کەریم رەشید، یەكێكە لە نەقارە دیرینەكانی سلێمانی بەشداربووە لە زۆرێك لە بینا و پڕۆژە گەورەكانی سنووری سلێمانی ئەو بە كوردستان24 گوت: "كاتێك بەنداوی دوكان دروستكرا لەوێ نەقاڕیم كردووە، ھەروەھا بۆ بیناكانی سەرچنار بەردی بە 4 فلس دروستمان دەكرد، بەڵام ئەو كاتە زۆر ئاسوودە بووین".
دەشڵێت: "راستە كارەكەمان ماندوو بوونی زۆرە، بەڵام خۆشییەكەی ئەوەیە كە سەربەستین و كاری خۆمان دەكەین و باشیەكەشی ئەوەیە توانیومانە بەو پیشەیە بژین".
زیاتر لە 30 نەوەی ھاتوونەتە ناو پیشەی نەقاڕکردنی بەرد، ناو بەناوە حاجی کەریمیش بەسەریان دەکاتەوە، تا بەھەرەوەزی کارە قورسەکان ئەنجام بدەن.
ھ.م