رێبوار تاڵەبانی: دادگا بێ تاوانی منی سەلماند و لە داهاتوو دەگەڕێمەوە کەرکووک

K24 – هه‌ولێر:

رێبوار تاڵەبانی، سەرۆکی ئەنجوومەنی پارێزگای کەرکووک، ئەستۆ پاکی لەلایەن دادگاوە وەرگرت و لەکۆنگرەیەکی رۆژنامەوانیدا سوپاسی پشتگیرییەکانی سەرۆک بارزانی کرد.

لە کۆنگرەیەکی رۆژنامەوانیدا، رێبوار تاڵەبانی رایگەیاند: "هەوڵەکانمان بۆ ئەوە بووە دەستوور لە کەرکووک جێبەجێبکرێت ئەوەی ئێستا هەیە بارودۆخێکی نائاسایی و نادەستوورییە"

راشیگەیاند: "من دانم بەو بارودۆخە نەنا بۆیە سکاڵایان لەسەر تۆمار کردووم، بەڵام زۆر سوپاسی جەنابی سەرۆک بارزانی و حکوومەت و ئەو حزبە کوردییانە دەکەم کە پاڵشتیان کردم".

ئاماژەی بەوەشدا: "دوێنی دۆسییەکە کۆتایی پێ هات و هیچ دۆسییەک لەسەر من نەماوە".

لە وەڵامی پرسیاری رۆژنانووسان، رێبوار تاڵەبانی رایگەیاند: "هەولێر و بەغدا لە پەیوەندیدان بۆ چارەسەرکردنی رەوشی کەرکووک و من لای خۆمەوە چەندین سکاڵام دژی کارە نادەستوورییەکان تۆمار کردووە".

لەبارەی گەڕانەوەشی، سەرۆکی ئەنجوومەنی پارێزگای کەرکووک گووتی: "لەگەڵ ئاساییکردنەوەی رەوشەکە، من دەگەڕێمەوە کەرکووک و هەرگیزیش نەمگتووە کە ناگەڕێمەوە".

لە دوای رووداوەکانی 16ی ئۆکتۆبەر، وەک بەرپرسێکی کورد، سکاڵا لەسەر رێبوار تاڵەبانی تۆمار کرا و هەوڵی دوور خستنەوەی لە کارەکەی دەدرا، بەڵام ئەو هەوڵانە پووچەڵکرانەوە.

 H.J