سەرۆکی حکوومەت و جێگری وەزیری دەرەوەی پۆڵەندا کۆبوونەوە

K24 – هه‌ولێر:

ئەمڕۆ چوارشەممە، 31 ی تەمووزی 2019، مەسرور بارزانی، سەرۆکی حکوومەتی هەرێمی کوردستان، لەگەڵ ماسیج لانگ، جێگری وەزیری دەرەوەی پۆڵەندا، کۆ بووەوە و پرسی وەبەرهێنان و سەرمایەگوزاریی هاوبەشیان تاووتوێ کرد.

جێگری وەزیری دەرەوەی پۆڵەندا خۆشحاڵیی خۆی بە ئارامیی و ئاسایشی هەرێمی کوردستان دەربڕی و رایگەیاند، ئەم سەقامگیرییە دەرفەتێکی باشە بۆ وەبەرهێنەرانی پۆڵەندا، بۆ ئەوەی سەرمایەگوزاریی لە هەرێمی کوردستان بکەن و ئاماژەی بەوەش دا، کە بەم زووانە شاندێکی بازرگانیی پۆلەندی سەردانی هەولێر دەکات.

سوپاسی هەرێمی کوردستانیشی کرد کە سەرەڕای سەختیی و نالەباریی دۆخی ئابووری، کەچی باوەشی بۆ ژمارەیەکی زۆری ئاوارەکان کردەوە و یارمەتی وهاوکاریی پێویستی پێشکەش کردوون.

لای خۆیەوە، سەرۆکی حکوومەتی هەرێمی کوردستان سوپاسی شاندی میوانی کرد و گوتی: دەرفەتێکی باش لە هەرێمی کوردستان هەیە بۆ وەبەرهێنانی بیانی، بۆ ئەم مەبەستەش ئاسانکاریی پێویست پێشکەش دەکرێت.

H.J