لە خانەقین بۆمبێك بەھێزەكانی حەشدی شەعبیدا تەقییەوە
ئۆپەراسیۆن دژی چەكدارانی داعش بەڕێوەدەچێت
K24 - گەرمیان
ھەرێم جاف، پەیامنێری كوردستان24 لە دەڤەری گەرمیان رایگەیاند: "شەوی رابردوو لە نزیك گوندی شێركی سەر بە خانەقین بۆمبێك بە ھێزەكانی حەشدی شەعبیدا تەقییەوە و چەكدارێكی حەشد کوژرا و دووی دیكەش بریندار بوون".
ھاوكات سەرچاوەیەکی ئەمنی لە پارێزگای دیالە ھەواڵەكەی پشتڕاست كردووەتەوە و ئاشكرای كردووە، لە یەکەم رۆژی دەستپێکردنی قۆناخی سێیەمی ئۆپەراسیۆنی (ئیرادەی سەرکەوتن) بەهۆی تەقینەوەی بۆمبێکی چێندراو، لە نزیک گوندێکی دەورووبەری خانەقین، چەکدارێکی حەشدی شەعبی کوژرا و دووی دیکەش برینداربوون".
دوێنێ، بە ئامادەبوون و سەرپەرشتی راستەوخۆی عادل عەبدولمەهدی فەرماندەی گشتی هێزە چەکدارەکانی عێراق، وەزیرانی بەرگری و ناوخۆ و فەرماندەی ئۆپەراسیۆنە هاوبەشەکان، قۆناخی سێیەمی ئۆپەراسیۆنی ئیرادەی سەرکەوتن، لە سنووری پارێزگای دیالە دەستیپێکرد.
ھ.م