عادل عەبدولمەھدی لەسەر خۆپیشاندانەكان ھاتەدەنگ

K24 - ھەولێر

سەرۆک وەزیرانی عێراق لەسەر خۆپیشاندانەکانی بەغدا و شارەكانی دیكە هاتەدەنگ و بەڵێنی وەڵامدانەوەی سەرجەم داواکارییەکانی خۆپیشاندەران دەدات.

عادل عەبدولمەهدی، سەرۆک وەزیرانی عێراق لە بەیاننامەیەكدا رایگەیاند "خۆپیشاندان مافێکی سرووشتییە، بەڵام هەندێک کەس رێڕەوی خۆپیشاندانی ئاشتیانەیان تێکداوە و درووشمی وایان بەرزکردووەتەوە کە سزای یاسایی لەسەرە"

سەرۆک وەزیرانی عێراق، ئاماژەی بەوەشدا، بەشێک لە خۆپیشاندەران بە چەقۆ و شووشەی ئاگردارەوە هێرشییان کردووەتە سەر هێزە ئەمنییەکان، بەڵێنیشیدا وەڵامی سەرجەم داواکارییەکانی خۆپیشاندەران بداتەوە و لیژنەیەکی لێکۆڵینەوەش پێکبێنێت.

بەگوێرەی دوایین ئاماری وەزارەتی تەندروستی عێراق، لە خۆپیشاندانی شارەکانی بەغدا و چەند پارێزگایەکی دیکەی باشووری عێراق، خۆپیشاندەرێک لە بەغدا و یەکێکی دیکە لە ناسرییە کوژران و 200 کەسیش برینداربوون، کە نزیکەی 40 کەسیان، ئەندامی هێزە ئەمنییەکانن.

ھ.م